'Drug lord', bata-bata napatay sa engkwentro sa kapulisan

Hulagway ni Benjie B. Talisic
Hulagway ni Benjie B. Talisic

Number 1 most wanted person sa Central Visayas ug gitumbok nga usa sa mga dakong drug lord sa Sugbo nga si Nilo Quirante napatay sa engkwentro tali sa kapulisan sa Huwebes sa alas 3:30 sa kaadlawon, Agusto 13, 2020 sa Barangay Tungkil, lungsod sa Minglanilla, habagatang Sugbo.

Ang mga sakop sa Regional Drug Enforcement Unit 7, Regional Special Operations Group 7 inabagan sa Dumanjug ug Minglanilla Police Station mo-serve unta sa warrants of arrest kang Quirante, apan giingong nisukol kini sa kapulisan hinungdan nga nahitabo ang engkwentro.

Lakip sa napatay ang giingong bata-bata ni Quirante nga si Faustino Torres, number 2 most wanted person sa lungsod sa Dumanjug.

Si Quirante nakaangkon og mga samad sa kalawasan ug ulo hinungdan sa iyang pagkamatay diha-diha.

Ang kapulisan nagdala og warrants of arrest sa mga kasong murder, frustrated murder, multiple frustrated murder ug illegal drugs sa mga korte sa lungsod sa Barili ug Dakbayan sa Sugbo.

Si Police Colonel Benedict Poblete, pangu sa RDEU 7 ug nangu sa police operation, nisulti sa Superbalita Cebu, nga tulo ka mga buwan ang ilang pagsige og pangita kang Quirante.

Human nila makuha ang lainlaing mga impormasyon, matod ni Poblete, ilang nasubay nga naa kini sa lungsod sa Minglanila.

Mga tulo ka adlaw ang nakalabay, ilang nakompirmar nga naa si Quirante nagpuyo sa Barangay Tungkil hinungdan nga ilang gipanid-an.

Nakuha gikan sa crime scene ang mga sachet sa gituohang shabu, KG9 submachine pistol nga iya ni Quirante ug .45 caliber pistol nga iya ni Torres.

Si Quirante, 68, kanhi sakop sa Philippine National Police ug nadestino sa Probinsya sa Sugbo, gikatahong ni absent without official leave (AWOL) mga kapin sa dekada na ang nakalabay.

Nahimo siyang most wanted sa Sugbo ug Central Visayas human nalambigit sa illegal drugs ug mga pagpamatay sa lalawigan.

Si Quirante gitumbok nga pangu sa mga gun-for-hire nga naglihok sa habagatang bahin sa lalawigan sa Sugbo nga nagbase sa Dumanjug.

Isip pangu sa iyang drug group, si Quirante ni-operate isip usa sa mga sanga ni anhing self confessed drug lord Franz Sabalones, matod sa kapulisan.

Daghan nang police operations sa nanglabay nga katuigan, apan kanunay siyang makaipsot. (BBT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph