APOHAN nga lalake nalipay kay nag-reunion tali sa iyang duha ka mga lalakeng apo, apan nahimong trahedya ang hitabo kay ang 3 anyos namatay human aksidenting napusilan 6 anyos nga maguwang niadtong Miyerkules, alas 9:20 sa buntag, Agusto 12, 2020 sa Barangay Bago, lungsod sa Asturias.
Tinuod nga ngan sa mga bata ug lolo gipugngan ning mantalaan kay puro menor ang nangalambigit.
Si Edwin (di tinuod nga ngan), 3, taga Barangay Colonia, Tuburan, dead-on-arrival (DOA) sa Vicente Sotto Memorial Medical Center (VSMMC) alas 3 sa hapon sa samang adlaw.
Ang bata wa na kaaguwanta sa samad sa ulo diin nalubong ang diyolen nga bala sa improvised airgun nga gigamit sa iyang maguwang nga si Mark (di tinuod nga ngan), 6, sa pagpusil kaniya.
Ang mga bata ilo na sa ilang inahan hinungdan nga ang ilang amahan na lang maoy nag-alima.
Si Major Stephen Amamag-id, hepe sa Asturias Police Station nga nahinabi sa Superbalita Cebu, nagkanayon nga alas 12:00 na sa Miyerkules sila gipahibawo dihang si Edwin gidali sa pagdala sa tambalanan sa Dakbayan sa Sugbo kay kritikal.
Unsay nahitabo?
Matod ni Amamag-id nga ang mga bata uban sa ilang amahan gikan sa lungsod sa Tuburan nipauli kay namista sila sa Bago.
Si Amamag-id nagkanayon nga si Bert (di tinuod nga ngan), apohan, nibutyag kanila nga ang mga bata ilang gidala sa ilang payag duol sa ilang balay kay nanguha silag kumpay aron ilawog sa ilang binuhing baka.
Kuyog niya ang iyang asawa, samtang ang mga bata nalingaw sa pagduwa-duwa sa payag.
Ang amahan giingong nanagkot sa kapilya niadtong higayuna kay pista.
Wa na matiwas nila sa pagkuha sa kumpay human ilang nadungog ang sipang buto sa pusil ug ilang nadunggan ang usa nila ka apo nga niping-it sa kasakit.
Sa pagsusi ni Bert, ang iyang apo samdan na sa ulo hinungdan nga nagdali silag nangayog panabang sa mga silingan.
Matod pa ni Amamag-id nga ang apuhan niangkon nga iyaha ang improvised airgun.
Sumala pa ni Bert nga ang pusil iyahang gikargahan daan og bala nga diyolen ingon man gibutangan sa og kemikal nga maoy mo-trigger sa pagbuto.
Ang armas iyang gibitay sa bitayanan sud payag apan nakuha kini ni Mark aron duwaan.
Giandam niya ang armas aron iyang magamit sa pag-abog sa mga dangan nga moatake sa ilang pananom, sama sa unggoy og ubang mananap.
Gikasubo niya ang sayong kamatayon sa iyang apo kay fiesta unta sa ilang dapit, nagkatapok sila uban sa mga apo.
Gipriso
Tungod sa maong impormasyon, si Bert gikustodiya sa kapulisan sa Asturias ug gikompiskar ang improvised airgun.
Giklaro ni Major Amamag-id nga ang apuhan ilang pasakaag kasong negligence resulting to homicide in-relation to Republic Act (RA) 7610 kun Special Protection of Children Against Abuse, Exploitation and Discrimination Act.
Samtang ang 6 anyos nga maguwang ilang gi-turn over sa social welfare sa ilang lungsud aron maatiman sanglit nakita nila nga na trauma sab ang maguwang human sa insedente.
"Ang among tan-aw, Sir, dul-it pagtiro sa bata. Basin nagtion-tion siguro to siya unya nakablitan. Kon mag-atubang ka sa biktima, kana gani sa iyang tuong nga bahin sa ulo, diha malubong ang bala nga diyolen," dugang ni Amamag-id.
Samtang wa na nila mahinabi ang amahan sa bata kay nagdali kini sa pag-uli sa Tuburan aron mopahibawo sa ilang mga kabanay kay nangitag ikagasto sa hospital. (GPL)