PADADA, Davao del Sur -- Wa manumbaling ang mga tinun-an kung unsa nga pamaagi sa pagtuon ang tumanon tungod sa giatubang nga pandemya sa tinguha nga makab-ot ang saktong edukasyon.
Kini human nga namatikdan nga mas misaka pa ang ihap sa enrollees sa Padada National High School (NHS) kung diin milabaw pa kini sa gilaumang motungha sa school year 2020-2021.
Nadugang sa populasyon sa tunghaan ang 53 ka tinun-an nga mi-enroll sa Grade 7 hangtud Grade 10.
Nakatampo sa taas nga enrollees ang paningkamot sa mga magtutudlo sa maong eskuwelahan ang pag-aghat kanila sa pag-eskuwela luyo sa giatubang nga hulga sa Covid-19 pandemya.
Subay sa datus sa tunghaan sa school year 2019-2020, anaa lamang sa 894 ang nagpa-enroll, apan karon mokabat na sa 947 ang nalista sa ilang record.
Sa maong ihap, 285 niini ang Grade 7; 255 sa Grade 8; 232 sa Grade 9; ug 175 sa Grade 10.
Bisan ang Grade 11 ug 12 nadugangan sab og 29 ka tinun-an, diin anaa na sa 176 ug 217 ug sa kinatibuk-an anaa sa 393 ang enrollees itandi sa 364 niadtong miaging tuig.
Nakahukom ang Department of Education (DepEd) nga blended learning ang pamaagi sa klase nga sugdan karong Agosto 24, apan mas gipili sa mga tinun-an ug ginikanan nga modular self-learning ang method sa pagtuon.
Apan nasayran nga ipatuman gihapon sa DepEd ang asynchronous recorded class kung diin pagahatagan og audio ug video material gamit ang USB aron masabtan gihapon sa mga estudyante ug pupil ang ilang leksiyon bisan og wa na kini sa ilang mga classrooms.
Dakong hagit sa mga magtutudlo ang pagtudlo sa mga ginikanan nga giyahan ang ilang mga anak sa modular learning sanglit mas dakong papel ang ilang himuon aron masabtan sa ilang mga tinun-an ang mga instructions ug aktibidad nga nakalatid sa mga booklets.
Nasayran nga apil nga gamiton sa Padada NHS ang television ug radio class aron mas daghang opsiyon ang mga ginikanan ug kabataan nga mas daling masabtan ang ilang leksiyon. (Orlando B. Dinoy)