ADUNAY potensyal nga mahimong usa ka All-Star nga magduduwa sa National Basketball Association (NBA) sa ugma damlag ang batan-ong Pinoy nga higante nga si Kai Sotto.
Mao kini ang panahom ni Brian Shaw, kinsa maoy trainer sa NBA G League Select Team nga gilangkuban og dekalidad nga batan-ong mga basketbolista gikan sa nagkalainlaing suok sa kalibutan lakip na niini si Sotto.
Bisan wala pa siya personal nga naka-train kang Sotto apan sa tan-aw ni Shaw, susama kini og abilidad ni Denver Nuggets All-Star big man Nikola Jokic, kinsa usa ka Serbian.
“I think he has the ability to play like Nikola Jokic,” paghulagway ni Shaw kang Sotto, kinsa adunay aduna na’y gitas-on nga 7’2” sa edad pa lang nga 19, nga napatik sa Spin.ph.
Gipaambit ni Shaw ang iyang panahom kabahin kang Sotto sa social media kagahapon.
Matod ni Shaw nga malipayon siya sa iyang nakita kabahin sa potensyal ni Sotto, kinsa gituohang maoy labing unang lumad nga Pinoy nga makaduwa sa NBA.
“Kai can shoot the ball from the outside. Obviously, I haven’t had the chance to be around him yet, but from the film I’ve watched on him, it looks like he can shoot the ball from the outside,” asoy ni Shaw.
“He can be a facilitator where you can put him on the top of the floor, give him the ball, and do dribble hand-offs much like Jokic.”
Si Sotto taodtaod na sab nga nag-training sa The Skill Factory sa Atlanta, USA sa tinguha nga mas mahashasan pa ang iyang abilidad.
Sa wala pa siya milarga sa Amerika, nagduwa siya sa Ateneo Blue Eaglets diin nag-average siya og 25.1 puntos, 13.9 rebounds, 3.4 assists, ug 2.4 blocks sa katapusang niyang tuig sa UAAP.
Sa iyang pagduwa sa UAAP, nakitaan na og dakong potensyal si Sotto.
Sa iyang pagduwa sa 2019 Fiba Under-19 World Cup sa Heraklion, Greece, padayon si Sotto pagpagawas sa iyang potensyal. / ESL