Malipayong balita alang niadtong nagsunod sa Pinoy version sa Korean nga serye nga “Descendants of the Sun” sumpayan na sa GMA 7 ang maong teleserye human kini napili nga Most Popular Foreign Drama of the Year sa ika-15 nga Seoul Int’l. Drama awards.
Mga pahalipay! Nahunong ang paggaling sa serye sa pagsugod sa quarantine. Sa pagsumpay niini, gipasalig sa mga tagdumala nga tumanon nila ang mga health protocol.
Ang Pinoy version gibidahan nila ni Dingdong Dantes, Jennylyn Mercado, Rocco Nacino, Andre Paras, Chariz Solomon, Paul Salas, Lucho Ayala, Jon Lucas, Prince Clemente ug Hayle Mendez.
Naka-istorya sa E-Group ang grupo sa Pista Senyor ug bisperas sa Sinulog Grand Parade. Pila ka semana sukad niadto, gisugdan pagsalida ang serye sa Kapuso Network.
Nalingaw kong nagtan-aw sa Bawal Judgmental segment sa Eat Bulaga ning semanaha kay mga kanhi batan-ong artista ang gibutang isip mga tinubdan sa mga kasayuran nga tag-anon sa niapil sa maong segment.
Sila si Jao Mapa, Lindsay Custodio, Joshua Dionisio, Chubi del Rosario ug Rainier Castillo.
Nibiya sila sa pag-artista ug pila kanila negosyante. May niabag sa kapikas sa pag-alagad sa ilang simbahan.
Bisan medyo nibug-at sila tan-awon pero nagpabilin pa gihapon ang ilang pamarog isip artista.
Gipahibawo sa ABS-CBN ang paglunsad sa Kapamilya Online Live sa YouTube ug Facebook pages aron makapadayon sa pagsunod ang mga suki nga tumatan-aw sa mga programa.
Sa niaging Biyernes, gipahigayon ang virtual presscon sa bag-o niining serye nga “Ang Sa ‘Yo Ay Akin” nga gibidahan nila ni Jodi Sta. Maria, Iza Calzado, Sam Milby ug Maricel Soriano.
Gidapit ko ni Justin Irons sa ABS-CBN corporate communications nga moapil sa virtual press conference pero wa ko kasulod. Grabe kahinay sa internet connection.
Karong Lunes, si James Banaag na sab sa Star Cinema AdProm ang nangimbitar alang sa virtual media conference atol sa paglunsad sa The Four Bad Boys & Me, ang labing unang istorya sa Listen to Love lovecast series.
Hinaut nga di na magpabadlong ang internet. Apil baya ni sa mga giyawyawan ni Tatay Digong sa iyang State of the Nation Address sa niaging buwan. Hinaut dunay mga maayong kalambuan.
Ang mga bida sa The Four Bad Boys & Me mao sila si Kaori Oinuma, Rhys Miguel, Jeremiah Lisbo, Chie Filomeno, Karin Bautista, Aljon Mendoza, Mark Rivera ug Alora Sasam. Si Maymay Entrata ang host. Atangi.