Gipasalamatan nila ni Cebu City Mayor Edgardo Labella ug Police Regional Office (PRO) – 7 Director Brig. Gen. Albert Ignatius Ferro ang 151 ka mga sakop sa Special Action Force (SAF) tungod sa ilang pagtabang sa pagpatuman sa mga protocol batok sa COVID-19. Sayud kita nga ang gihimo sa SAF mao ang pagbadlong ug pagdakop sa mga tawo nga dili magsul-ob og facemask ug dili mag-physical distancing. Ila usab nga dakpon ang moguwa sa balay nga dili magdala sa quarantine pass. Ang labing mahinungdanon nilang trabaho mao ang pagbantay sa mga dapit nga gipaubos sa lockdown.
Sumala ni Mayor Labella nga dako og natabang ang SAF sa pagkunhod sa coronavirus. Mao usab kini ang pagtuo ni Inter-Agency Task Force (IATF) Overseer Secretary Roy Cimatu. Sa ato pa, klaro na gyud nga disiplina maoy hinungdan sa pagpugong sa pagsaka sa COVID-19. Kon mao kini, dili na lang nato hasulon ang atong kaigsuonang kabus sa pagsul-ob niining face shield kay mahal baya alang kanila. Angay pasagdan sa gobiyerno kon kinsay makapalit ug gustong mosul-ob niini. Kinahanglang hugtan lang ang information campaign og unsay kaayuhan nga mahimo niini sa tawo. Samtang daghan ang buot mosul-ob niini apan angay sabton kadtong dili mopalit kay ila kining i-una pagpalit og pagkaon. Nganong dili man magahin ang gobiyerno og salapi alang pagpalit niini ug ipanghatag ngadto sa mga kabus kaysa ipamalit nato kini og mga test kits nga balor og minilyon ka pisos nga walay kasiguro-an ang resulta?
Daghan nang mga ngalan sa tambal ug bakuna ang gihisgutan sa nagkalainlaing mga nasud. Ang una niini mao ang Remdesivir nga hinimo sa Johnson & Johnson ug Sanofi. Naa usab ang chloroquine ug hydroxychloroquine. Wa pa kini approval apan gi-indorso na kini ni Presidente Donald Trump sa Estados Unidos sa America (USA). Naa usay Favipiravir sa China ug Avigan sa Japan. Naglumba sila kon kinsa kanila ang unang mahatagan og approval aron ila kining mabaligya. Apan sumala pa sa mga eksperto nga molanat og usa ngadto sa usa’g tunga ka tuig usa makapalit ang katawhan og aprobadong bakuna sa coronavirus.
Apan ang Russia mitanyag na kang Presidente Rodrigo Duterte og bakuna nga ginganlan og Sputnik Five. Gisaway dayon kini sa ubang mga tawo labi na sa oposisyon kay dili kuno kasaligan kining hinimo sa Russia. Misaad usab kang Presidente Duterte ang China nga unahon kita nila sa pag-supply sa ilang bakuna. Nganong mahadlok man kita nga dili man kini mahimong gamiton kon dili ma-aprobahan sa Food and Drug Administration (FDA) sa atong nasod? Kon nahadlok ang uban niini apan isog kaayong gipahibawo sa Presidente nga siya maoy unang magpabakuna niining Sputnik Five nga iyang ipakita sa publiko. Inay atong dauton kining mga bakuna gikan sa Russia o kaha China, mas maayo man gani nga magpasalamat kita kanila kay dili baya masiguro kon maka-ambit pa kita sa maong mga bakuna sa Amerika ug sa ubang mga nasud. (mannyrabacal 1144@gmail.com)