Ang Sputnik I mao ang labing unang satellite nga gilusad sa kawanangan sa kanhi Soviet Union niadtong Oktubre 4. 1957. Ang Soviet Union mao ang labing unang nasod nga adunay satellite sa low Earth orbit. Naunhan sa Russia ang Estados Unidos sa lumba sa kawanangan.
Ang Russia mao ang labing unang naka-develop og bakuna batok sa coronavirus disease (Covid-19). Ginganlan ni Russian President Vladimir Putin ang bakuna og Sputnik V, tingali isip timaan nga sa lumba batok sa Covid-19, naunhan nila ang US.
Nipasalig si Russian Ambassador to the Philippines Igor Anatolyevich Khovaev kang Cebu City Mayor Labella nga magahinan ang syudad og bakuna batok sa Covid-19. Kalamboan nga hangpon sa mga residente sa syudad nga dugay nang nag-antos sa quarantine.
Apan unsa ka luwas ug kaepektibo ang maong bakuna? Si Russian President Vladimir Putin niingon nga luwas ug epektibo ang Covid-19 vaccine nga gi-develop sa Gamaleya Institute sa Moscow. Gani, usa sa iyang mga anak nga babaye gibakunahan ug maayo ra ang kahimtang.
Samtang si Presidente Rodrigo Duterte andam nga magpabakuna kon ang Russian vaccine moabot dinhi sa nasod. Apan matod pa sa lagda mismo sa gobyero, diskwalipikado ang pangulo kay ang unahon diay sa clinical trial mao kadtong mga health workers ug ang mga tawo nga adunay contact sa mga pasyente nga giktaboyan sa Covid-19.
Ang health ministry sa Russia niingon nga wa pa mahuman ang clinical trials sa Sputnik V ug ang final stage sa testing nga naglangkob sa 2,000 ka mga tawo gisugdan niadto pang Miyerkoles.
Samtang ang World Health Organization (WHO) niingon nga aprobahan lang nila ang maong bakuna human sa makuting pagrepaso sa tanang safety and efficacy data. Apan bisan wa pay WHO approval, 20 ka mga nasod ang ni-order na og usa ka bilyon ka doses niini.
Ang WHO niingon nga adunay 165 ka mga kandidato nga bakuna batok sa Covid-19. Ug kon lumba ni, ang Sputnik V maoy unang naabot sa finish line. Seguraduhon lang nga ang gibakunahan, tingalig apil ta ana, di maoy ma-finished.