Editoryal: Wa nay kwarta

Editoryal: Wa nay kwarta

Sukad gipatuman ang enhanced community quarantine (ECQ) sa Dakbayan sa Sugbo, dunay mga lugar nga gihigpitan og maayo ang lockdown. Di tibuok barangay ang gi-lockdown. Kon gamay ra ang mga kaso, balay ra ang gi-cordon.

Nganong giingon man niini ang gihimo sa kagamhanan? Kini tungod kay dako og gasto ang lockdown kay abagan man kini sa kagamhanan pinaagi sa paghatag og food supplies ug uban pang mga panginahanglan. Makahurot sa pundo sa gobyerno ang mga lockdown.

Bisan si Presidente Rodrigo Duterte, sa iyang nasudnong pagpamulong, niangkon nga wa nay pundong magasto ang kagamhanan. Hurot na, matod niya, ang gigahin sa Kongreso alang sa hinabang sa mga apektado.

Binilyon ka pesos ang nagasto sa kagamhanan, nasudnon ug lokal, sa pag-bag sa katawhan panahon sa quarantine. Busa, di tiaw ang gasto sa gobyerno.

Dinhi sa Dakbayan sa Sugbo, gihigpitan gihapon ang paggawas sa mga tawo pinaagi sa number coding sa QR coded pass. Sama lang gihapon nga ang siyudad ubos sa ECQ. Di gusto ni Mayor Edgardo

Labella nga masubli na sab ang pagsaka sa mga kaso dihang gilugakan sa makadiyot ang quarantine status sa siyudad niadtong sayong bahin sa Hunyo.

Kay kon mosaka og balik ang gidaghanon sa coronavirus infections sa siyudad, posibleng mahibalik na sab ngadto sa modified ECQ o MECQ. Nagsugod na unta og irog ang ekonomiya, mobalik na usab

kini sa pagpanira. Modugo na sab ang negusyo, apil na ang gobyerno.

Apan daghan gihapon ang di makasabot. Magyawyaw nganong did-an sila sa paggawas sa balay. Wa man gidili ang paggawas sa balay sa mga trabahante sa mga industriya nga gitugot nga mobukas.

Gitumong ang paghigpit sa paggawas aron di mobalik sa uno kay lagi wa nay kwarta ang gobyerno. Sa ginaingon pa, mahutdan man gani ang tinubdan, unsa na kaha ang panudlanan sa kagamhanan nga nagsalig sa mga buluhisan?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph