GIHANGYO sa konseho sa Dakbayan sa Mandaue ang Mandaue City Environmental and Natural Resources Office (Cenro) nga magpahigayon og pagpahibalo kabahin sa saktong paglabay sa personal protective equipment (PPEs).
Pinaagi sa resolusyon ni Mandaue City Councilor Joel Seno, giaprubahan kini sa konseho sa ika-57 nga regular nga sesyon niadtong Miyerkules, Agusto 12, 2020.
Alang kang Seno nga sa sige og gamit sa mga tawo og disposable PPEs lakip na ang face masks, wala kini mahatagi og dakong pagtagad ang tarong nga paglabay niini.
Sa mga miaging semana gipatuman sa dakbayan ang pag-sul-ob og mask sa publikong lugar ug makamulta og P5,000 sa dili motuman.
Gikonsiderar kini nga isyu sa health apan sa dili madugay, mahimong isyu sa kalikopan labi na sa paggamit og disposables, matod ni Seno.
Sa resolusyon, gipahayag niini nga ang dili husto nga paglabay niini nga mamahimong makahatag og risgo sa mga tawo nga makapunit o makahikap sa maong basura.
Dugang pa niini nga mahinungdanon ang pagpahibawo ug pag-edukar sa publiko sa husto nga paglabay sa face masks, tissue, wipes, gloves ug uban pa nga PPEs nga mamahimong nagdala sa
Covid-19 aron mapugngan nga matakdan ang laing tawo sama sa mga basurero ug kadautan sa kalikopan.
Kung dili sakto ang paglabay sa mga PPEs, makahatag kini og problema sa atong kalikopan labi na sa pagsaka sa gidagahnon sa basura ug sa mga makadaot nga basura.
Ang pagsul-ob sa PPEs pang-proteksyon batok sa Covid-19, ang resolusyon nagtinguha sab nga ang sakto sa paglabay niini susama sa importansya sa pag-sul-ob niini.
Sa pakighinabi sa Superbalita Cebu ni Engr. Marivic Cabigas, pangulo sa Department of General and Services, nga kinahanglan pa siya nga makigkoordinar sa mga Clean and Green nga mga kawani sa pag-monitor sa paglabay sa mga PPEs. / KFD