SUPERBALITA DAVAO

Sugilanon: Berta (Una sa napulo ka mga gula)

DAVAO. Ang iring nga si Berta. (Hulagway kuha ni Jeepy P. Compio)

SA TIBUOK nakong kinabuhi, wala gayod nasanapan akong hunahuna sa mga butang diha sa makapadasig aron mobuhi og hayop, apan ning bag-o lang daw nabali ang kanhi nga panglantaw sa kinabuhi, ug nahimong sa karon, daw nagtuyok kini sa mga takna ug eksena sa akong pinangga nga si Berta.

Sa among pamilya, si Zandro, ang kamanghuran nga lalaki sa among managsuon, kinsa bisan og sa bitin nga iyang binuhi niadtong bata pa siya di gayod kini mahadlok diin si Prince-Prince lamang ang akong pag-umangkon ang mahiligon sa iro ug sa iring.

Niadto ang mga nahitabo, buhi pa ning kasamtangan sa akong panumdoman nga kining si Prince magduwa gyod kaayo aning iring nga nganla'g Minggay, usa ka Puspin (Pusang Pinoy), gani ginabadlong pa nako kini kay lagi basin og masakit, apan luyo sa iyang pagkalingaw kang Minggay, daw di gyud ko niya mapansin.

Ning bag-o lang, daw nituyok ang kalibutan ngari nako, daw nabalik ang mga kagahapon gikan sa nanglabay'ng mga katuigan. Nakabisita ko sa bay sa akong higala nga si Jeepy, - daghan kaayo siya'g iring.

Human sa general community quarantine (GCQ) misugat sa akong panan-aw ang daghan kaayong iring sa pagsud ko sa iyang gipuy-an, ug nakasulti ko sa akong hunahuna nga kung asa ang panahon sa krisis mao pa'y pagdaghan sa iyang mga binuhi, - mahal baya kaayo ang pagkaon, mga tambal pa niini.

Nahimo pa nga unod sa among mga pakatawa mao ang iyang pagsulti nga maghinayhinay kuno ko sa pagtunob basin unya matamakan ang tag-baynte singko mil, hangtud miabot sa punto nga naminaw lang gyud ko niya sa iyang gipaambit nga mga pinasahe nga kasinatian sa iyang mga binuhing iring.

Naminaw lang ko, daw dili makita sa akong dagway nga naganahan ko samtang siya nagpadayon sa pagpaambit. Mas miturok ang gana ngari sa akong hunahuna dihang iya nang gipaambit ang klase sa iring, usa niini ang Persian cat nga daw naganahan ko.

Mipaambit pa gyod siya kung pila kabuok ang anak sa usa ka inahan nga iring, nga puwede kining moanak og pito kabuok ug mabaligya sa tag otso mil hangtud kinse mil.

Nakasiyagit ko human nako kini nadungog, nagkatawa og naa sa akong hunahuna ang pulong nga daw di katuohan, ug miingon ko nga iring lang na, ug gusto nakong molakaw kay giubo ko sa iyang balay kay daghang balahibo nga nanglupad.

Nakaabot ko sa balay nako. Nagpahuway. Kalit mitawag akong higala nga anaa nagtudlo sa New Era University, sa iyang video call, mibahis-bahis ang iring ibabaw sa lamesa nga nakuha sa video, naa sab sa ibabaw sa telebisyon, -diay daghan sab siya og binuhi nga iring, sama kang Jeepy.

Sa maong takna, diri na nagsugod ang kalbaryo sa akong hunahuna sa daghang nagdula nga panguntana ug daw hinayhinay nang nagsugod sa pagturok ang higayon sa akong pagkagusto sa pagbuhi sab og iring.

(Ipadayon sa sunod nga mga gula)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph