NAG-OBSERBA sa kahimtang sa panglawas ug gimandoan nga papangayuon og medical certificate sa barangay ang unom ka mga titser sa usa ka dakong pampublikong tunghaan sa Davao City human sila giingong nakahalubilo sa giingong person under investigation (PUI) sa coronavirus disease (Covid-19) nga bisita sab sa birthday party sa Talomo District, Davao City.
Kini subay sab sa nakuhang impormasyon sa Superbalita gikan sa kasaligang tinubdan Biyernes sa udto, Agusto 14, 2020.
Sumala sa tinubdan nga lima o unom ka magtutudlo ang nakahalubilo sa giingong PUI sa Covid-19 sa usa ka birthday party.
Una niini, natingala ang ubang miyembro sa faculty sa tunghaan dihang mideklara og hinanaling aksyon ang administrasyon diin gikan Agosto 14 hangtud Agosto 24, 2020 dili tugtan ang mga titser nga mo-report sa eskuwelahan ug mag-work-from-home sa maong mga adlaw.
Mga magtutudlo nga nakaadto sa birthday party sa ilang kanhi principal, gimandoan nga mo-report sa ilang barangay health center, mangayo og health certificate aron maka-duty sila sa Agosto 25.
Hinuon giingong di seryuso ang maong hitabo apan maneguro na lang, butang nga kadtong mga titser nga nakaadto sa birthday sa ilang kanhi principal kinahanglan mohimo gayod og home quarantine ug gilayong mo-report sa barangay.
Bisan og magduha na ka semana nga nahitabo ang birthday party gikan sa pagsuwat ning balita, gipaseguro pa gayod sa administrasyon sa tunghaan nga luwas ang mga kaubanang magtutudlo pinaagi sa di pagpa-report niini hangtud Agosto 24.