DAVAO DEL SUR -- Hugot nga nagpasidaan ang Department of Trade and Industry (DTI) sa probinsiya ngadto sa tanang namaligya og face shield nga tumanon ang Standard Retail Price (SRP) nga anaa sa kantidad P26 ngadto P50 lamang.
Matud ni Delia Ayana, DTI-provincial director, nga ilang bantayan ang mga mosupak sa balaod sanglit mahimong magatubang kini og silot.
Giangkon sa DTI nga nakadawat na sila og reklamo nga adunay mga namaligya og overpriced face shields.
Sagad sa mga namaligya og face shields nga mahal ang presyo mao ang mga online seller gamit ang Facebook diin nasayran nga anaa kini sa P75 pataas.
Apan matud sa face shield vendor nga si Honey Mae nga tag P50 na daan ang ilang kumprada gikan sa supplier sa Manila, mao nga kinahanglan silang mopatong og P10 aron makaganansiya og gamay.
Gipasabot sa DTI nga subay sa memorandum order gikan sa nasyonal nga buhatan, ang mga non-medical grade face shield mao ang anaa sa SRP nga tag P26 ngadto P50.
Mialma sab si Ellaine Labra nga taga Bansalan human nga nakapalit siya og face shield nga tag P95.
Sayo ning semanaha, nagbaha na ang mga nag-post og baligyang face shields sa social media ug bisan sa mga merkado, ilabi na nga hingpit na kining ipatuman sugod Sabado, Agosto 15.
Sumala sa DTI nga makig-alayon sila sa Department of Health ug Criminal Investigation and Detection Group alang sa paghimo og lakang sa mga overpriced face shields.