Tungod ining mga mangtas nga sakitsakit nga midagsang karon, ang akong mga higalang aduhan ug dunay igong bahandi, nagpabuhat na sab sa ilang mga last will and testament isip pamilinbilin ug paneguro ingkaso dunay mahitabo nila.
Ang uban sab nakong kaila nga nang-retire, naneguro sab og hipos sa ilang hinaguang tinigom og pension kay di kuno nila matag-an ang panahon unya dunay mga anak nga di na magpakabana ug mang gilaboat sa ilang mga ginikanan labi na og wa silay makuha unya masakiton na.
Kini ra bang utang na loob lisud ibugto unya mura ka og ihikot ini hangtod sa kahangturan unya di sab kabayran.
Sa akong pagbisita sa Dumaguete City, City of Gentle people. di pa kaayo dugay, akong gituyo pagpamahaw sa ilang merkado sayo sa buntag og kaon sa ilang lamiang puto ug sikwate og didto akong nakita ang nagbaha nga mga senior citizens nga nama-init sayo sa kabuntagon.
Nag-iyahay sila og hantak-estorya og kukabildo sa ilang mga sekrito kung unsaon pabata. Midako akong dunggan pagpaminaw kay nahimuot ko sa ilang mga true-to-life nga mga gipaambit.
Ang usa mi-ingon iyang sekreto tubig ra gyod. Ang pag-inum og daghang tubig dako og matabang sa panlawas. Ipadayon ang pag-inum og 8 ka baso kada adlaw aron di mag-uga unya padayong lagsik.
Ang usa sab mi-ingon ipadaplin ang paghuna-huna sa problema. Ang kaguol, maoy maka stress maong ang mga butang nga di makontrolar o mapugngan, ihangad kini ug i-ampo kay ang labaw nga makagagahom maoy mahibalo sa tanan.
Laing edaran misumpay nga ang segi og kasuko makasamot sa kunot maong pasaylua na lang ang mga nakalapas nimo aron maga-an gaan ang paminaw.
Naay usa simpli iyang tampo, katawa ug smile kanunay kay mao kini birtod nga makapasamot sa ka -anyag nga way gasto. Katapusan, ayaw pagdinawo. Ipanghatag imong subra og ipa-ambit imong talento. Di tanang butang dinhi sa yuta mapalit.
Mao kini mga tambag nga di nako malimtan bisag asa pa ko dad-on sa akong lapa-lapa.