Daghang nagpaabot sa opisyal nga pahibalo gikan sa Regional Inter Agency Task Force (RIATF) karon, Sabado, Agusto 15, diin gikatakda ang laing pagpahibalo sa quarantine status sa tulo ka mga highly urbanized nga dakbayan sa Metro Cebu nga ubos sa general community quarantine (GCQ) ug dakong bahin sa sa Lalawigan sa Sugbo nga ubos sa modified general community quarantine (MGCQ) gawas sa dakbayan sa Talisay, mga lungsod sa Consolacion ug Minglanilla nga ubos sa GCQ.
Ang dapit nga ubos sa GCQ, magpabilin kaha sa status o ipaubos na sa MGCQ? Dakong bahin sa lalawigan nga MGCQ andam na kaha sa pagplastar sa bag-ong normal human sa krisis sa coronavirus disease 2019 (Covid-19) o magpabilin sa samang status sa kuwarentina?
Sa Dakbayan sa Sugbo, posible nga mapaubos sa MGCQ human gilibkas ang granular lockdown sa pipila ka sitio sa unom ka mga barangay sa dakbayan niadtong Sabado, Agusto 13.
Malaumon ang kinatibuk-ang kaso sa Covid-19 sa dakbayan human nagkaminos ang kaso ug daghang nangaayo kon itande sa nangamatay. Nagkaubos ang kurba sa kaso sa naasoy nga sakit. Sukwahi kini sa kaso sa Dakbayan sa Manila, National Capital Region ug pipila ka mga lalawigan sa Luzon nga gibalik sa mas estrikto nga modified enhanced community quarantine.
Manghinaut kita nga magpadayon ang pag-ubos sa kaso sa Covid-19 sa Sugbo. Igo na ang “pagkabinggo” og dul-an sa unom ka buwan sa kuwarentina. Ang ekonomiya padulong motikyaob kon magpadayon ang lockdown sa kuwarentina.
Daghang isyu nga mitumaw sama sa dili maayong pagdumala sa krisis sa Covid-19 ngadto sa korapsiyon sa pagluwat og pundo ug pagpamalit og mga gikinahanglan batok sa virus.
Magpabilin sa GCQ o mausab ngadto sa MGCQ, hugot mosunod sa protocol. Isalikway ang pamulitika. Maghiusa kita sa batok sa komon nga kaaway nga dili makita--ang Covid-19.