ISIP pagdisiplina sa mga konstituwente sa lungsod sa Consolacion, giawhag ni Mayor Joannes Alegado ang konseho sa pagpasar og ordinansa nga magsilot sa mga tawo nga di molain sa paghipos ug paglabay isip basura sa nagamit nga masks.
Sukad sa pagsulbong sa coronavirus disease 2019 (Covid-19) pandemic, nahimong panginahanglanon ang face mask ug uban pang mga protective equipment aron malikay sa sakit.
Apan nabalaka si Alegado sa dili insaktong paglabay niini tungod kay posible nga makatakod sa lain nga mga konstituwente nga unta way gihambin nga sakit.
“Sa pagkakaron, nakita nato for the past two weeks pagsugod og GCQ, a lot of our residents sige og gamit og mask. Ubay-ubay naggamit og mask. Makita nato sa libod-suroy ang uban, ipanglabay bisag asa lang and i-sagol sa uban basura and mag-pose og risgo sa katawhan kay ang mask isul-ob sa nawong, sa baba. Bisag di positibo sa Covid, pero naa gihapoy kagaw ning mask. Atong malikayan ang
pag transmit sa kagaw through the garbage,” matod ni Alegado, kinsa usa usab ka doktor, sa Agusto 14.
Matod ni Alegado, sagad sa nakolekta nga mga basura mga protective equipment sama sa mask, gloves, face shieldas ug goggles. Ang lungsod sa Consolacion may gibana-bana nga 5,000 ka workers karong quarantine period.
Matod ni Alegado nga kon kining tanan manag sul-ob og disposable masks matag adlaw paingon sa trabahoan, dako na kini nga risgo sa tanan nga makahanggap sa kagaw nga gikan sa maong mga ekipo nga ipanglabay.
“Ako gyud gi-awhag nga ilahi nato sa lain nga sudlanan and dili ma contaminated. In protection sad ni sa atong mga basurero and garbage collectors ang ato is ang proper disposal sa infectious waste unya kasagaran sad incineration. Mao na ihatod nato na sa usa ka sanitary landfill,” matod ni Alegado.
Hinungdan nga buot ni Alegado nga kon mahimo silutan ang masakpan nga maglabay sa dili insakto nga labayanan.
Gilaraw ang multa nga P500 sa unang offense; P1,500 sa ikaduhang offense ug P2,000 sa ikatulong offense.
“Unya gihangyo ang council pud nga maghimo ug ordinance not necessary naay silot if butangan nila ug penalties discipline and inculcate to people nga naa tay kalihopan at the same time health conscious ta. Ithink makatarunganon sad if naay penalties, whatever penalties pwede sad kanang community service. I believe nakita pud na nila nga problema kahibaw pud sila unsa ka seryoso run ang situation dili lang tungod sa health tungod sad sa environment,” dugang sa mayor. / ANV