Sugod sunod semana, ang bag-ong gi-hire nga mga contact tracer sa Mandaue City ipakatapy na sa 27 ka mga barangay.
Ang kagamhanan sa Mandaue adunay 37 ka contact tracers nga na-hire ug nakahuman na sa ilang training sugod niadtong Agusto 10, 2020 hangtod Agusto 13, 2020.
Matod ni Lawyer Julius Ceasar Entise, nangulo sa Contact Tracing Team sa Dakbayan sa Mandaue, niingon nga i-deploy na karong Lunes, Agusto 17, 2020 ang contact tracers.
Usa ka contact trcaer matag barangay samtang ang 10 niini ibutang sa Contact Tracing operations center (CTOC).
Sigon ni Entise nga kining mga contact tracers mag-house to house gihapon ngadto sa mga kompirmado nga nagpostibo sa coronavirus disease (Covid-19) kauban ang mga contact tracers sa barangay ug pulis sa Mandaue City Police Office (MCPO).
Dugang pa niya nga kining mga bag-ong gi-hire nga contact tracer mao ang mag-supervise sa contact tracing team sa barangay apan kuyog gihapon sila nga mag-house to house aron kung adunay mga impormasyon nga wala maapil sa barangay sila ang mukuha niini.
Tungod kay ang mga contact tracer nga ibutang sa mga barangay bag-o sa pagtrabaho, sigon ni Entise nga ila gihapon abagan sa ilang trabaho.
“I will personally look into their work, whether they are working as expected or if there’s a need for us to make necessary adjustments,” sigon ni Entise.
Sa niaging mga semana, adunay mga higayon nga dili magkatakdo ang mga datos nga gipagawas sa dakbayan sa Mandaue ug sa Department of Health (DOH).
Ang mga kalainan sa mga datos usa ka dako nga problema sa dakbayan labi na nga mahinungdaon kini sa pagdesisyon sa mga local chief executives, matud ni Entise.
Aron masulbad kini, adunay usa ra ka source sa maong datos alang sa Mandaue City Health Office (MCHO) nga ipasa ngadto sa DOH ug sa Emergency Operation Center (EOC) sa Mandaue, ingon ni Entise.
Gawas sa team management data, ang contact tracers nga gipadala sa barangay ang muhatag sa mga datos nga nakolekta sa baranagy ngadto sa Contact Tracing Operations Center (CTOC) o sa Tactical Operations Center.
Samtang, ang CTOC ipasa ang mga datos nga ilang nakolekta ngadto sa MCHO ug sa EOC. / KFD