Usa ka kilo nga shabu nga mobalor og P6.8 milyunes ang nasakmit sa hiniusa nga operasyon sa Philippine Drug Enforcement Agency (PDEA)-7, Regional Intelligence Unit (RID) ug Regional Drug Enforcement Unit (RDEU) -7 ug PDEG Visayas sa Sityo Ermita Proper sa Barangay Ermita, siyudad sa Sugbo kahagapon sa hapon, Agusto 14, 2020.
Si PDEA 7, Regional Director Levi Ortiz, sa pakighinabi sa mga sakop sa media, niila sa nadakpan nga si Eranes Baltazar Jr., 40, molopyo sa nasoy nga dapit ug kasamtangan usa ka delivery driver sa usa ka food delivery app.
Nasakmit gikan kang Baltazar ang usa ka kilo nga shabu nga gihulagway nga class ‘A’ nga shabu nga pinutos pa nga naka-vaccum sealed ug gikan pa sa gawas sa nasod.
Matud ni Ortiz nga usa ka high value target si Baltazar ug gituohan nga miyembro kini sa usa ka dakong drug syndicate sa Central Visayas.
Ang dinakpan taudtaod na nga gi-monitor sa PDEA 7 apan wala pay miabot nga drugas hinungdan nga ila kini nga gihulat nga kahiayonan.
Duha ka semana ang milabay una pa giplano ang pagpangronda kang Baltazar human sa taho sa tigpaniid sa PDEA nga dunay moabatay nga drugas sa suspek.
Si Baltazar gituohan nga gigamit ang food delivery app isip takoban ug drugas ug makalusotlusot sa mga boarder line sa kuwaretina.
Ang PDEA 7 usa sa ilang susihon kon giunsa sa pag-abot sa maong kontrabando gikan sa laing nasud nga miabot sa Pilipinas nga wala masayri sa awtoridad.
Ang dinakpan walay laing komento gawas lang sa pag-ingon nga wala siya’y kasayuran nga ang iyang gidala shabu diay ug nasayopd na lang siya dihang nadakpan.
Si Baltazar napriso niadtong tuig 2002 ug nakagawas sa 2005 sa kaso nga robbery with homicide.
Sa laing bahin, igsuon ug inahan sa napatay nga drug lord gituohang misunod sa negosyo a ilegal nga drugas nadakpan sa mga ahente sa PDEA-7 saSityo Kawayan, Barangay Sambag 2, dakbayan sa Sugbo niadtong Myerkules sa hapon, Agusto 12.
Si IA1. Jessie Cabutotan, nangulo sa anti-illegal drug operation, niila sa dinakpan nga si Teodoro, 39, ug inahan niini nga si Magdalena, 58, ug iyang manghud nga si Josephine Villamala ug pulos molupyo sa naasoy nga dapit.
Moabot sa 8 gramos nga shabu ang narekober gikan sa tulo nga mobalor og P54,400 subay sa iyang Dangerous Drugs Board (DDB) value.
Giingon dili mominus sa 100 gramos sa shabu ang mabaligay sa mga Villamala matag semana, subay sa monitoring sa awtoridad. / BBT