MAIKUGON kitang mga Bisaya ug, sama sa ubang mga Pilipino, dili nato buot mapaulawan atubangan sa uban. Mao kini nga aduna kitay mga pasiuna kon may isulti kita nga medyo bug-at, sama sa “ayaw lag kalain ha” o “kon akoy pasultion”, ug uban pa. Usahay kon adunay mahinungdanon kaayong himuon ug nanginahanglan og tabang, moingon kita: “wa ni pugsanay...apan wa say balibaray”.
Matinahuron kaayo ang paganong babaye nga nagpakitabang kang Jesus alang sa iyang giyawaan nga babayeng anak. Sayod siya sa panagbingkil tali sa mga Judio ug sa mga taga-Canaan. Wala siya mamugos kang Jesus. Wala pod siya magpabalibad kaniya. Wala niya panumbalinga nga daw gisalikway siya ni Jesus diha sa kahilom niini ug sa iyang nagsunodsunod nga tubag, sugod sa “wala ako gipadala gawas lamang sa mga nawalang karnero sa balay sa Israel” unya gisundan og “dili maayo nga kuhaon ang pan sa mga anak ug ilabay sa mga iro”.
Kon kulang pa ang pagtuo sa babaye hagbay ra siyang mihunong og hangyo. Apan sa dihang morag nagbutang og dakong babag si Jesus mahitungod sa dili angay ilabay sa iro ang pan para sa anak, mitubag siya: “Oo, Ginoo, apan bisan gani ang mga iro makakaon man sa mga mumho nga mahulog gikan sa lamesa sa ilang mga agalon”. Niining yugtoa nahingangha si Jesus: “O babaye, pagkadako sa imong pagtuo! Mahitabo kanimo sumala sa imong gitinguha”. Ug naayo ang iyang anak.
Wala mamugos ang babaye kay nagpabilin siyang matinahuron sa pagkagawasnon ni Jesus. Apan wala pod siya magpabalibad pinaagi sa angay nga tubag nga nagpadayag sa iyang lalom ug dimatarog nga pagtuo kang Jesus.
Makaingon kita nga ang wala damha nga pagkalakip sa maong babaye sa buhat sa kaluwasan ni Jesus gitagna na ni propeta Isaias nga miingon nga ang balay sa Ginoo, nga mao ang templo sa Jerusalem, mahimong “balay-alampoanan alang sa tanang katawhan”. Tungod sa iyang hugot nga pagtuo, ang maong balay nagdayeg sa Ginoo nga mao si Jesus.
Sa laing bahin, si San Pablo Apostol maoy nagpadayon ug nagpalambo sa gisugdan ni Jesus, pinaagi sa Espiritu Santo. Nahimo siyang apostol ngadto sa mga gentil kansang pagdawat kang Jesus, samtang gisalikway siya sa kadaghanan sa mga Judio, lakip sa misteryo sa pagpangluwas. Ang pagdawat sa mga gentil kang Jesus nagpadangat sa himaya sa Dios. Naghulat si Pablo sa panahon nga dawaton sa mga Judio si Jesus ug makab-ot na ang hingpit nga kaluwasan.
Dili mamugos ang Ginoo kanato nga dawaton ang iyang bugtong Anak. Apan pinaagi sa hinayhinay nga pagdani kanato dili pod Siya magpabalibad. Ania na kanato kon unsay atong tubag kaniya.
Unsa pa may atong gihulat?