SUPERBALITA CEBU

Nalzaro: Mga entertainers tabangan

Saksi

ANG usa ka sektor nga grabeng naapektuhan aning coronavirus disease (Covid 19) mao ang anaa sa entertainment industry. Ang mga big time ug small time singers. Mga miyembro sa banda, mga solo singer sa mga hotel, night clubs ug bars. Bisan man gani ang mga nanakay og mga cruise ship ug kadtong mga tig-concert. Daghang mga stand up comedians ang wala nay kita gumikan kay wala na may manan-aw sa ilang mga shows.

Daghan nang nanira nga mga bars sukad nag-lockdown gumikan kay gidili man ang mga tapok-tapok. Nanira man gani ang ubang mga restaurant kay dili naman modawat og mga customer. Order og take out naman lang. Dili pod maka-perform ang mga singers o mga banda sa espisyal nga mga okasyon sama sa kasal ug birthday parties gumikan kay gidili lagi ang mga gathering. Wala man gani tuguti ang mga engrandeng kasal.

Daghan kog mga amigo nga anaa sa entertainment industry ang naapektuhan ug wala na gyuy income karon. Kanta-kanta na lang sila sa balay. Wala man poy videoke kay sirado man ang mga karaokihan. Wala gyuy entertainment karong mga panahona. Apil man gani ang mga artista, hunong ang pag-taping sa mga TV show ug paghimo og pelikula.

Dinhi sa Cebu City, mihimo og lakang si Konsihal Nina Mabatid nga matabangan ang mga apektadong entertainers. Usa ka resolusyon ang gisang-at ni Mabatid sa konsiho nga maghatag og ayuda sa mga entertainers. Cash, bugas ug de lata ang posibleng mahatag sa city government ngadto sa mga entertainer. Na-aprobahan na ang resolusyon ni Mabatid niadtong Agusto 4 ug ang desisyon na lang sa mayor ang gihuwat aron ma-release na ang budget ug mapalit na ang ayuda. Maayo kining lakang ni Mabatid kay dako kinig tabang sa mga wala intawoy income.

Apan mas maayo siguro nga klarohon usab ang listahan sa kay daghan ang nagpatuo-tuo pod nga entertainers apan dili diay. O basin og pipila lang ang mo-angkon sab ani labi pa kon ihatag sa usa ka grupo nga maoy manglista kunuhay sa entertainers. O ba kaha sudlan ni og pamulitika. Salamat ni Konsihal Mabatid nga nagpakabana sa mga taga entertainment industry. (bobbygnalzaro@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph