NAG-VIRAL diay ang post sa anak sa usa ka nurse nga namatay sa coronavirus disease (Covid-19) human niya gibutyag nga P64 ra ang inadlaw nga hazard pay sa iyang inahan. Bisan tuod kon gihimakak sa usa ka mayor ang alegasyon kay P300 kuno ang adlaw, apan dinhi makita kon unsa diay ang pagtratar sa kagamhanan kanila, labina niadtong naa sa pribadong mga tambalanan.
Gikaltasan kun gikuhaan pa kuno og mga deduction ang hazard pay sa iyang inahan. Hayan mao ni ang hinungdan nganong gamay na lang ang nadawat.
Karon, ang Department of Health (DOH) mi-propose og budget alang sa tag P500 nga adlaw sa hazard pay sa mga health worker sa pribadong mga ospital. Kini nga lakang maayo kaayo kay dako na kini og tabang sa mga health worker sa mga pribadong institusyon.
Sa pribado man gud, gagmay ra kaayog sweldo ang kadaghanan kanila. Naa pay mga nurse nga nagdawat lang og P15,000 ang buwan. Ubos kaayo kini kon itandi sa mga nurse nga naa sa pampublikong mga tambalanan. Unya mas kapoy kini sila og trabaho, labina sa mga tambalanan nga nagkuwang og mga medical personnel.
Kon ubos sila og sweldo, unsa na kaha ang mga nurse aide ug uban pa? Seguradong mas ubos sila og rate.
Sa dihang nagkadaghan og maayo ang mga kaso sa coronavirus disease (Covid-19) sa Sugbo, gitaho sa kapunongan sa nurses ang daghan nilang mga sakop nga nang-resign. Gawas sa kahadlok, ilang nakita ang kakuyaw ug kabug-at sa trabaho samtang ang sweldo wa makasaka.
Hinaut pa nga bisan magkinaunsa, ang hazard pay sa mga health worker nga nagkombate batok sa Covid di hilabtan og bisan usa ka dako. Kuyaw pa ang ilang trabaho, gamay pa og sweldo bisan sa kadako sa risgo, kinsa man kaha ang ganahan molahutay?
Kining hazard pay usa ka paagi sa pag-ila sa ilang dakong natampo sa kombate batok sa Covid-19.