Cebu City, 5 ka dapit sa Cebu GCQ pa

ANG Dakbayan sa Sugbo, apil na ang duha ka highly urbanized cities sa Dakbayan sa Mandaue ug Lapu-Lapu, ubos gihapon sa general community quarantine (GCQ).

Lakip sa nagpabilin gihapon sa GCQ mao ang Talisay City ingon man ang mga lungsod sa Minglanilla ug Consolacion. Kining tulo mao na lang ang mga dapit sa Lalawigan sa Sugbo nga ubos sa GCQ. Ubang mga dapit sa Lalawigan ubos na sa modified GCQ, labing lugak sa mga quarantine level.

Kining unom ka dapit sa Sugbo naapil sa labing minos 10 ka mga dapit sa nasod nga ubos sa GCQ tungod sa hulga sa coronavirus disease 2019 (Covid-19), pahibawo ni Presidential Spokesperson Harry Roque sa Sabado, Agusto 15.

Laing mga dapit sa nasod nga ubos sa GCQ mao ang Iloilo City, Quezon Province, Batangas ug Nueva Ecija.

Si Presidente Rodrigo Duterte mopahibawo sunod semana sa community quarantine classification sa National Capital Region (NCR), Bulacan, Cavite, Laguna ug Rizal nga ubos sa modified enhanced community quarantine (MECQ).

Ang ubang mga dapit sa nasod ubos na sa modified GCQ, labing lugak nga quarantine classification, matod ni Roque.

Ang Inter-Agency Task Force (IATF) for the Management of Emerging Infectious Diseases niingon sa ilang Resolution 63, nga giluwatan sa Biyernes, Agusto 14, nga ang quarantine classifications gikonsiderar nga base kini sa level sa risgo sa epidemic, ekonomiya, sosyal ug seguridad, ingon man ang pag-apelar ug commitment sa local government units.

“The National Task Force and DILG shall ensure that areas flagged for local action shall implement strict lockdown of areas in line with the Zoning Containment Strategy, strict enforcement of minimum health standards, and intensified tracing and quarantine of close contacts and isolation of confirmed cases,” matod sa IATF Resolution 63.

WAY KAUSABAN

Si Cebu City Mayor Edgardo Labella niingon nga way mga kausaban sa community quarantine protocol sa siyudad.

Matod ni Labella nga di gihapon siya motugot sa pagbukas sa mga internet shop, kay kadaghan sa internet shops nga nahimutang sa siyudad gagmay og lugar ug gahuot.

Tungod ani, di matuman ang social distancing.

“Because we tried to inspect some of the internet cafes and we found out that it’s not really conducive or ideal to observe social distancing, especially that there are some elements that the spaces are quite compact and small,” sulti ni Labella sa SunStar Cebu sa phone interview.

Matod ni Labella nga ang QR coded nga quarantine pass kinahanglan gihapong dad-on sa mga residente aron maseguro nga ang mga tawo manggawas lang aron mamalit ug sa uban pang mga panginahanglan.

Samtang bisan kon andam na unta ang Dakbayan sa Lapu-Lapu nga ipaubos sa modified GCQ sugod Agusto 16, wala gihapoy nakitang problema si Lapu-Lapu City Mayor Junard “Ahong” Chan sa desisyon sa IATF nga ipabilin una ang dakbayan sa GCQ.

Alang sa mayor ang maong desisyon nagpasabot lamang usab nga aduna na usay laing 16 ka adlaw ang mga Oponganon nga ipadayon ang single-digit nga mga resulta sa positibong kaso sa dakbayan hangtod nga mawala na kini sa hingpit.

Nanawagan ang mayor sa mga Oponganon sa padayon gihapong pagsunod sa mga lagda sa gobyerno sama sa pagsul-ob kanunay sa face mask, pag-obserbar sa physical distancing, paghugas sa mga kamot ug kon mahimo mogawas lang sa balay kon kinahanglanon.

Nakita sa mayor nga ang pagsunod sa naasoyng mga health protocol maoy usa sa hinungdan sa pagkunhod sa kaso sa dakbayan.

Usa kini sa nakaingon nga mikunhod sa 70 porsyento ang gidaghanon sa mga pasyente sa mga pribado ug pampublikong tunghaan sa dakbayan nga may kalambigitan sa Covid-19.

“Nagpaabot diay og pasalamat ang atong nurses ug doctor gikan sa public ug private hospitals kay nakaginhawa sila gamay,” matod ni Chan ngadto sa mga Oponganon.

Mao usab ang Dakbayan sa Mandaue, gihangop ang desisyon sa nasyonal nga gobyerno.

Sigon ni Atty. John Eddu Ibañez, executive secretary ni Mandaue City Mayor Jonas Cortes, nga gihangop nila ang rekomendasyon tungod kay di sab gusto ang kagamhanan sa dakbayan nga mokumpyansa.

Bisan paman nga padayong nagsaka ang ilang recoveries ug niminos na ang nagpositibo sa kaso sa Covid-19, alang kang Ibanez nga di gihapon ni panahon sa pagkumpyansa tungod kay ang usa ka tawo nga magpositibo mamahimo nga makatakod og 30 ngadto sa 100 gatos ka mga tawo.

Sa Biyernes, Agusto 14, 2020, ang dakbayan sa Mandaue aduna na lay 413 ka aktibo nga mga kaso sa Covid-19, 1,513 na ang nakarekober samtang ang 82 ang namatay.

Si Talisay City Mayor Gerald Anthony “Samsam” Gullas, sa iyang bahin, niingon nga angay dawaton unsa may hukom sa IATF. Angay pang magpasensya ang mga Talisaynon.

“Kailangan lang gyud sa ta ug taas nga pasensya. Kasabot ko nga daghan na ninyo gusto mubalik ta sa normal pero as long as walay bakuna nga mukontra batok sa Covid-19, lisud gyud nga makabalik ta sa normal,” matod ni Gullas sa iyang pamahayag. Iyang gipaneguro nga maninguha gihapon ang Siyudad nga mapugngan ang pagkatap sa Covid-19. (dugang taho ni JJL,GCM, REV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph