KANANGA, Leyte - Nasikop sa kapulisan ug Philippine Drug Enforcement Agency (PDEA) ang usa ka notado nga drug personality sa lalawigan sa Leyte.
Giila ang suspek nga si Edwin Benyel Navia, 33, minyo ug nagpuyo sa Barangay Sto. Niño, Kananga, Leyte.
Base sa report sa awtoridad, naa sa listahan sa kapulisan sa probinsya ang suspek ug naa sa rank 18.
Usa ka ahente sa PDEA ang nagpaila nga mamalitay og shabu ang nakigtransaksyon sa suspek dala ang P500 nga marked money gikan sa awtoridad.
Napalitan og usa ka pakete sa gituohang shabu ang suspek ug dali kini nga gipalibotan sa mga awtoridad.
Gisaksihan sa taga media, barangay official ug representante sa Department of Justice ang pagkapkap sa suspek.
Nakuha gikan sa possession sa suspek ang laing 12 ka pakete sa gituohang shabu nga nagkantidad og P6,500.
Gihimakak sa suspek ang alegasyon.
Gipaubos sa kustodiya sa PDEA ang suspek alang sa dugang imbestigasyon ug pasakaan kini og kasong kalapasan sa Comprehensive Dangerous Drugs Act. (JKDP)