ANG bise mayor sa dakbayan sa Talisay, Alan Bucao, dako ang pagtuo nga makatarunganon ang desisyon sa Department of Education (DepEd) sa pagsibog sa klase ngadto sa Oktubre 5 gikan sa una nang nasabutan nga Agusto 24.
Matod ni Bucao, sa iyang tan-aw duna pay angayan nga plantsahon tungod kay siyento porsyento nga dili pa gyud andam ang pagsugod sa klase karong Agusto 24.
Gani nahimuot si Bucao sa desisyon nga dali-dali gipakanaog ug gisibog sa laing petsa ang pag-abli sa klase.
Alang kang Bucao, maayo kaayo kini nga desisyon aron ang mga magtutudlo makapangandam pa og tarong samtang ang mga tinun-an duna pay igong adlaw nga sila makahuna-huna sa ilang kulang sa ilang gamit sa pagtungha.
Dugang ni Bucao nga ang maong desisyon makapahiluna usab sa kabalaka sa mga ginikanan sa mga tinun-an tungod kay dili ikalimod nga padayon gihapon naa sa palibot ang hulga sa Covid-19.
“Somehow, kining maong postponement is advantageous sad sa mga students and parents considering nga wala pa nato ma-establish kon kontrolado naba gyud ang pagkuyanap sa Covid-19. In fact, many are still indoubt sa veracity sa numbers. as reported by DOH,” asoy sa bise mayor.
Sa Dakbayan sa Talisay, suportado nila ang DepEd sa ilang mga kalihukan ilabi na si Mayor Gerald Anthony “Samsam” Gullas Jr. mipasalig sa iyang suporta.
Hinuon giklaro ni Bucao nga ang medyo alanganin pa sa pagka karon mao ang pag himo ngadto na sa dugang modules. (BBT)