GIHANGOP sa kadagkoan sa Dakbayan sa Mandaue ang pag-anunsyo sa paglangan sa school year 2020-2021 ngadto sa Oktubre 5, 2020.
Ang kagamhanan sa siyudad ug ang Mandaue City division head sa Department of Education (DepEd) nga si Supt. Nimfa Bongo, uyon ra sila sa anunsyo sa nasyonal nga gobyerno sa pag-postpone sa pag-abli sa klase.
Sigon ni Atty. John Eddu Ibañez, executive secretary ni Mandaue City Mayor Jonas Cortes, niingon ang mayor nga gidawat niya ang postponement sa school year gikan sa Agusto 24 ngadto sa Oktubre 5, 2020.
Miingon siya nga kini nga pahibalo maghatag og dugang oras alang sa mga eskwelahan sa pag-andam sa mga kinahanglanon nga materyales sa pagbukas sa mga klase.
Sa usa ka text message gikan ni Bongo, siya niingon nga andam na ang modules alang sa unang tulo ka semana sa klase.
Apan alang sa kindergarten, andam na tanan niining modules gani andam nasad ang kindergarten kits lakip na ang school supplies nga i-apudapod ngadto sa mga estudyante.
Sa laing bahin, nagplano usab ang dakbayan nga gamiton ang pipila ka mga eskwelahan isip isolation center bisan human sa Agusto 15, 2020.
Ang Regional Inter-Agency Task Force (RIATF) sa miaging semana nitugot nila sa local government units (LGUs) nga gamiton ang mga eskwelahan isip isolation center hangtod sa Agusto 15, 2020.
Matod ni Ibañez, ang Mandaue nihangyo sa Department of Education (DepEd) sa Central Visayas nga lugwayan ang ilang paggamit sa upat ka mga eskwelahan sa dakbayan isip isolation facility. (KFD)