DAKONG sindikato sa gidiling drugas nga gitawag og Golden Triad nga nagbase sa gawas sa nasod maoy gigikanan sa 12 ka kilo nga gituohang shabu nga nagkantidad og P81.6 milyunes, banabana nga street value sa Dangerous Drugs Board (DDB), ang nasakmit sa Philippine Drug Enforcement Agency (PDEA) 7 uban sa kapulisan sa Central Visayas sa pier 3 sa dakbayan sa Sugbo niadtong Sabado sa gabii, Agusto 15.
Ang naasoy nga shabu nga gipresentar ngadto sa media, gipadala pinaagi sa usa ka courier service company nga nagbase sa dakbayan sa Mandaue gikan sa kaulohan ug gibiyahe pinaagi sa land trip.
2 ka K-9 dogs
Ang grupo ni IA1 Jessie Cabutotan kuyog ang ubang unit, nihimo sa ilang naandan nga tahas sa pagsusi sa courier companies gawas sa ilang mga ginahimo nga anti-illegal drug operations. Sa pag-inspeksiyon kuyog niini ang mga kauban sa K-9 units sa PDEA-7.
Sa pag-abot sa dapit, ang duha ka K-9 nga sila si ‘Aljur’ ug ‘Gab’ gipahimo na sa ilang tahas sa pagsimhot na sa mga bag-ong abot nga mga padala gikan sa kaulohan. Dihang ang duha ka mga K-9 nisimhot sa tulo nga mga equipment box, daling nilingkod ang duha.
“So, mao to pag x-ray naay nigawas nga mga organic substance which is unlikely for a dili organic nga material. So, positive gyud ta nga dunay sulod nga lain ug dihang atong giablihan ang usa ka kahon so mao to nga gidudahang shabu gyud atong nakita,” matod ni PDEA 7 Director Levio Ortiz.
Samtang, ang laing duha pa ka mga kahon giablihan usab ug pulos lang pareho ang mga sulod niini.
Ang tulo ka kahon nga kasagaran sudlan sa mga ekipo, dunay sulod nga LED nga spot light samtang sulod sa spot light dunay lain pang sulod nga upat ka mga lingin base sa nakita sa x-ray.
Tea bags
Pagsusi na sa maong ahensiya ang sulod sa LED nga spotlight upat ka mga interior rubber o guma porma og lingin. Nasuta nga usa ka tea bag nga plastik nga dunay pangan ‘Daguanyin’. Tagsatagsa nga gipang-ablihan ang maong mga tea bag nga aduna lang susama nga sulod nga pulos shabu.
Ang mga chemist sa PDEA 7 mipahigayon sa ilang pag-field check sa usa sa mga tea bag nga adunay sulod nga shabu ug positibo nga methamphetamine hydro chloride o shabu ang mga nasakmit.
Giangkon ni P/Lt. Col. Robert Limbawan, pangulo sa Regional Intelligence Division (RID) 7 sa Police Regional Office (PRO) 7 sa interview sa mga sakop sa media nga dakong kawad-on sa mga ilegalista ang nasakmit nga shabu.
Dugang ni Limbawan nga ang 12 kilos nga shabu gihulagway nga kon maabot ni sa mga durugista paspasan dayon kini nga ipang-apud-apod ngadto sa ilang mga suki.
Panawagan
Ang PDEA 7 nanawagan sa tanan nga courrier companies sa pagtabang sa kampanya batok sa gidiling drugas nga kon duna sila mamatikdan nga mga bagahi nga miabot kanila, mahimong makig-alayon dayon sila sa maong buhatan gawas sa paghimo sa regular nga pagsusi sa mga operatiba.
Samtang, si Ortiz nagkanayon nga wala pay na-monitor nga shabu laboratory sa Sugbo diin maklaro kini sa nasakmit nga drugas nga gisulod kini sa tea bag nga nagpasabot gikan sa gawas sa nasod ang maong supply.
Apan, dugang ni Ortiz, adunay local contacts sa siyudad sa Sugbo nga gitumoran sa maong mga kinilo nga shabu nga sakop kaniadto pa sa dagko nga drug group nga naglihok sa tibuok rehiyon 7.
“Dili lang nato i-disclose kung kinsa ni sila, mao nang nakakuha tag dagko nga trabaho karon because naa tay nailhan nga local contacts nila nga mao toy atong gipanid-an,” matod ni Ortiz.
Gihimo dayon nila ang subsob nga surveillance pinaagi sa abag sa kapulisan ug ang labing dako nga natampo ang komunidad.
Nagtuo usab si Ortiz nga tungod sa nasinating pandemic gipahimuslan sa drug lords ang pagpalusot sa ilang supply sa ilegal nga drugas sa pamasin nga dili sila masakpan.
Bisan pa man nga nakatutok ang halos tanang pulis sa Covid-19, wala usab nila wad-a ang pag-monitor sa pagkatap sa ilegal nga drugas.
“Mao man gyud na ang ilang pagtuo nga ang mga awtoridad naka-focus sa Covid so wala na kaayoy time nga mo-conduct og drug operations,” dugang ni Ortiz.
Gisabot ang tagduma sa courier company ug sa ilang pakig-alayon, gidala ang tulo ka mga kahon sa pier 3 aron masusi kini sa x-ray machine nga adunay kapasidad nga mo-detect sa mga bagahe.
Sa laing bahin, niadtong Agusto 14, Biyernes sa hapon, usa ka kilo nga shabu ang nasakmit sa kapulisan sa Sityo Ermita Proper, Barangay Ermita, siyudad sa Sugbo niadtong Biyernes sa hapon, Agusto 14.
Samang kaso
Ang nadakpan mao si Eranes Baltazar Jr., 40, excon sa kasong robbery with homecide, nagtakobang drayber sa usa ka delivery app ug molupyo sa naasoy nga dapit.
Sumala sa PDEA 7, gikan sa gawas sa nasod ang druga tungod sa klase sa pagpaputos niini ug ilang gituhoan ang dinakpan sakop sa internasyonal nga sindikato sa druga.
Si Baltazar nihimakak sa akusasyon ug niingon nga wa siay kasayoran sa gipadala isip drayber sa food delivery.
Apan ang kapulisan nibutyag nga dunay nang naniid kang Baltazar ug gitayming human og tip sa tigpaniid.