OPISYAL nga gipermahan sa atong Presidente Rodrigo Duterte ang Republic Act 11479 niadtong Hulyo 3, 2020, ug mi-epekto human sa 15 ka adlaw sa official Gazette niadtong Hulyo 18, 2020.
Bisan kung mi-epekto na kini, pero hangtrud karon mokabat na sa 29 ka sekta ang mipadangat didto sa Korte Suprema nga magluwat og Temporary restraining Order (TRO) tungod kay dili ikalimod nga adunay probisyon niini nga nahasupak sa atong 1987 Philippine Constitution ilabina sa tawhanong katungod.
Kinsa kini si Abduljihad Susukan? Siya ang Kumander sa kidnap-for-ransom, brutal nga pagpamatay pinaagi sa pagpamutol og ulo, nga mao ang grupo sa Abu Sayyaf.
Si Susukan maoy responsable sa pagputol og ulo sa Canadian national nga ilang gikidnap, ug Malaysian didto sa Jolo Sulu niadtong tuig 2016 ug blacklisted usab kini sila sa Estados Unidos sa mga series of bombing ug kompermado nga sakop kini sila sa Islamic State in Iraq and Syria (ISIS).
Si Susukan misurender kini kang Prof. Nur Misuari leader sa Moro National Liberation Front (MNLF) human sa aksidental nga pagbusikad sa M203 grenade atol sa engkwntro sa kasudalohan didto sa Sulu, kansa gituhoan sa mga sundalo nga patay na kining tawhana.
Didto kini siya sa hari-anong panimalay ni Misuari sa Sulu sukad niadtong bulan sa Abril ning tuiga, sa milabay’ng semana, gidala kini ni Misuari gikan sa Sulu sakay sa private plane gikan Sulu paingon dinhi sa Davao, ug matud pa, plano ni Misuari nga dalhon ang kumander sa Abu Sayyaf ngadto sa atong presidente Duterte, alang sa unsa? Aron pasayloon?
Nakurat ang mga tag-as nga opisyal sa atong militar tungod kay gipaka-ingon nila’g patay na kining tawhana, apan, gitagoan diay ni Misuari.
Alang sa kasayuran sa tanan, si Misuari dunay posisyon karon sa administrasyong Duterte, gitudlo siya isip Special envoy to the Organization of Islamic Cooperation (OIC) pero klaro nga wala siyay otorisasyon nga makipag-estorya ngadto sa mga terorista nga numero unong kaaway karon sa atong gobyerno ug maoy tumong sa Anti Terrorism Law.
Mipalag na si General Gapay ang bag-ong natudlo nga Chief of staff sa Armed Forces of the Philippines, tungod kay wa gyud silay kasayuran nga ni-a diay sa Davao ang public enemy number 1 nga si Susukan ug komander pa gyud sa Abu Sayyaf.
Nagpagula na og pamahayag si Senador Ping Lacson nga maoy author sa Republic Act 11479 nga mas na-ilhang Anti Terrorism Law, matud pa niya “Huwag naman sanang paghalo-in ang Anti Terrorism sa Law sa politika.”
Siyempre nakatutok karon ang atong mga lungsuranon niining isyuna tungod kay kining tawhana adunay 39 ka warrant of arrest sa nagkada-iyang kremin nga iyang nahimo.
Mao kini ang unang pagsubo niining balaora, kung hait ba gayod ang suwab sa Anti-Terrorism Law niining tinuod nga terorista, basig hait lang ang suwab niining balaora ngadto sa gagmay’ng mga tawong pobre nga dali rang pahamtangan sa silot.
Apan, habulan ang suwab ning balaora niadtong mga tinuod nga terorista nga gipaluyohan og politiko nga dikit sa atong administrasyon. Pero dako pa ang atong pagsalig sa Presidente.