DIGOS CITY -- Balik sa new normal na sab ang sitwasiyon sa dakbayan sugod kagahapong adlawa, Dominggo, Agosto 16, human gilibkas na sa lokal nga gobyerno ang liquor ban ug balik biyahe ang mga traysikel ug ubang pampublikong sakyanan.
Makabalik na sab sa panginabuhian ang mga negusyante human gitugtan nang moabri ang mga establisemento ug merkado publiko matag adlaw’ng Dominggo.
Gisibog na sab ang curfew hours gikan alas 9 sa gabii hangtud alas 5 sa buntag.
Kahinumdoman nga gimando ni Mayor Josef Cagas ang 15 ka adlaw nga liquor ban sugod niadtong Agosto 1 mao nga madunggan gikan sa mga palainom ang pinulongang "uhaw na ang kamel."
Gitugtan na sab nga makagawas ang publiko matag adlaw’ng Dominggo apan kung di mahinungdanon ang lakaw mas maayong magpuyo lamang sa panimalay aron malikay makamatay nga sakit.
Hugot nga nagpasidaan ang mayor nga padayong motuman sa mga protocol sa Inter-agency Task Force on COVID-19 sama sa pagmentinar sa social distancing, pagsul-ob og face mask ug proper hygiene.
Gitataw ni Cagas nga padayong magbantay ang mga personahe sa panglawas nga di mokatap ang sakit pinaagi sa gilayong pagpailawom sa kwarentinas sa mga indibiduwal nga nakitaan og mild o asymptomatic sa Covid-19. (OBD)