GIPAILAWOM sa duha ka adlaw nga pagbansay ang mga police nurses gikan sa mga nagkadaiyang istasyon sa Davao City Police Office (DCPO) labot sa specimen collection o swab test.
Ang training gipasiugdahan sa DCPO ug sa City Health Office diin ang unang hugna natigayon Agosto 13-14, 2020 ug ang sunod nga pagbansay mahitabo karong Agosto 20-21, 2020 alang sa 2nd batch didto sa Sta Ana Covid Center, R. Magsaysay St. Brgy 27-C, Davao City.
Moihap sa 31 ka mga police nurses ang misalmot diin nagtumong nga madugangan ang ilang kaalam kung paunsa magkolekta og specimen pinaagi sa ilong ug tilaok.
Sumala sa DCPO nga usa kini ka dakong kahigayonan nga angay makat-onan sa mga police nurses labi na nga kulang na ang mga doctors ug nurses sa mga ospital ning panahona.
Sa Davao City lamang hapit na sa 300 ang aktibong kaso sa Covid-19 samtang sa kinatibuk-ang Davao Region anaa na sa dul-an 600 ka mga kaso. (JPC)