GUMIKAN sa nagpadayong hugonhugon kabahin sa posible nilang panag-engkuwentro ni Filipino boxing icon Manny Pacquiao, nagsugod na sa pagpakondisyon si Kazakh boxing superstar Gennady Gennadyevich Golovkin (GGG).
Si Golovkin mibalik na sa Big Bear gym sa California, nga gipanag-iya sa kanhi kontra ni Pacquiao nga si “Sugar” Shane Mosley, aron hinayhinay nang mangandam.
Malipayon si Golovkin nga nakabalik na siya sa training human sa taas nga panahon.
“Back training in Big bear and it feels good. Discipline is key,” post ni Golovkin sa social media nga napatik sa philboxing.com.
“Gloves on, always the best feeling. Sometimes the only person that can see your goal, is you. Stay focused and you will achieve it. You, yes you, you can do it too. Hard work pays off.”
Kanus-a kaha siya makaaway?
Kon buot hunahunaon, kuli mahitabo nga magkrus ang dalan nila ni Golovkin ug Pacquiao gumikan sa gintang sa ilang timbang.
Si Golovkin kasamtangang nagkampanya sa middleweight division (160 lbs) samtang si Pacquiao sa welterweight category (147 lbs) diin pareho silang world champion.
Si Pacquiao, kinsa usa ka 8-division world champion, nipabuhagay nang daan nga dili siya makig-away kang Golovkin sa middleweight nga timbang.
Sa interbyu sa WBN, ang trainer ni Golovkin nga si Abel Sanchez nipadayag nga andam nga mopaubos sa junior middleweight (154) ang iyang batos aron ikaharong ang Pambansang Kamao ng Pilipinas.
Matod ni Sanchez nga andam sab si Golovkin nga makig-away sa wala’y pildeng si Floyd Mayweather Jr. sa 154 lbs. kon dili man gani mahitabo ang Pacquiao fight. (ESL)