ANG Cebu City Police Office nakadakop ug ni-file og kaso sa 50 ka mga quarantine violators subay sa City Ordinance 2566 sa Kagamhanan sa dakbayan sa Sugbo.
Ang CCPO, inabagan sa Cebu City Transportation Office (CCTO) ug Cebu City Prevention, Restoration, Order, Beautification, and Enhancement (PROBE) team sa dakbayan nagkumboya pagpatuman sa bag-ong ordinansa nga magsilot sa mga nakalapas sa minimum health standard.
Niadtong Agusto 16, unang adlaw sa pag-epekto sa ordinansa, sila nakadakop og 27 ka mga tawo.
Sa Lunes sa alas 12 sa udto, Agusto 17, 23 ka mga violators ang nadugang.
Si Police Major Randy Caballes, pangulo sa City Intelligence Branch (CIB) nagkanayon nga arestado ug pasakaan og kaso ang 50 ka mga dinakpan subay sa ordinansa aa siyudad.
Si Raquel Bohol-Arce, pangulo sa Probe, nagkanayon nga nakadakop sila og usa niadtong Agusto 16 ug tulo sa Agusto 17.
Ang CCTO nga gipangulohan ni Alma Barandog-Casimero nakadakop og 10 ka quarantine violators niadtong Agusto 16.
Base sa City Ordinance 2566 kun “An Ordinance Penalizing any Violation in Relation to the Implementation of General/Enhanced Community Quarantine in Cebu City During Public Health Crisis” ang mga madakpan mapriso og 30 ka adlaw o makamulta og P1,500 o depende sa hukom sa korte sa unang violation.
Naobserbahan ni Arce nga nagkamenos na ang mga quarantine violator sukwahi sa miaging mga buwan diin kapin sa 200 ka mga violators ang madakpan matag adlaw sa dihang wala pa moepekto ang ordinansa nila ni Konsehal Dave Tumulak, Raymond Garcia ug Phillip Zafra.
DISIPLINA
Matod ni Police Colonel Josefino Ligan, officer-in-charge sa CCPO, nga ang tumong sa odinansa aron madisiplina ang mga Sugboanon sa pagsunod sa tanang minimum health standard.
Ang mga pasahero sa bus nga mobiyahe parahon sa mga pulis nga nag bantay sa quarantine checkpoints aron susihon kon kini aduna bay dala nga quarantine pass ug misunod ba sa protocol.
“Gi-inquest ni sila nya arrested. Prisohon ni sila and then depende kon paspasan ni sa Fiscal pag forward sa ilang dokumento, information to the court then kon kinsa nga judge maoy mo handle ani, i-determine na dayon sa judge if pila ka adlaw ang ilang inprisonment,” matod ni Ligan. (PAC, AYB)