MAMAHIMONG mapasirhan ang usa ka establisemento o trabahoan kon ma-monitor sa duha ka mga ahensiya sa gobyerno ug sa lokal nga kagamhanan nga wala nag-face shield ang mga kawani niini.
Mao kini ang kabahin sa compliance monitoring and enforcement sa Joint Memorandum Circular (JMC) 20-04 Series of 2020 sa Department of Labor and Employment (Dole) ug Department of Trade and Industry (DTI).
Una na nga gianunsiyo ni Dole Secretary Silvestre Bello III niadtong nakalabay nga semana nga gikinahanglan naa usab ang face shield sa mga trabahoan sugod Agusto 15.
Ang JMC 20-04 naglangkob sa mga pribado nga establisemento, lakip na ang nadakadaiyang special economic zones ug ubang dapit nga ubos hurisdiksyon sa Investment Promotion Agencies.
“Face shields shall cover the entire face (completely cover the sides and length of the face). If possible, face shields should extend to the ears and below the chin,” ubos sa Article II Section B sa maong kamandoan.
Kinahanglan nga sul-ubon ang face shield kon makig-atubang sa mga kauban niini sa trabaho.
Mamahimo ra nga hubuon ang face shield kon gikinahanglan nga tangtangon o kon nahasubay kini sa mando sa tagsa-tagsa ka mga occupational safety and health officers sa trabahoan.
Gidli usab ang paggamit og eye shield isip alternative sa face shield. Naglakip kini sa visor, goggles ug uban pa.
Kinahanglan na usab nga mobutang og disinfecting/washing stations alang sa mga kawani ug sa mga bisita niini.
“Employers are encouraged to collaborate with the national and/or local government testing efforts like drive-thru or walk-thru testing facilities,” tipik sa circular kabahin sa Covid-19 testing.
Lakip bag-ong mando sa DTI ug Dole kining pagtukod sa Occupational Safety and Health Committees o safety officer sa tagsa-tagsa ka estbalisemento. Kon ugaling mapamatud-an nga wala misunod ang establisemento sa bag-ong mando sa maong mga ahensiya, pasirhan kini.
“In case of findings of non-compliance with this JMC, the private establishment shall be temporarily closed until further compliance with the prescribed minimum health protocols,” dugang sa circular.
Ang Dole, DTI, ug LGU Health and Sanitation Office mao ang mo-monitor niini. Ang JMC gipirmahan kini nila ni Bello ug DTI Secretary Ramon Lopez niadtong Biyernes, Agusto 14.