TUNGOD kay daghan nang mga residente nga mag-bike sa Dakbayan sa Mandaue, nagtukod ang kagamhanan og bicycle repair station niadtong Sabado, Agusto 15, 2020 nga gibutang sa S.B. Cabahug St., Barangay Centro, Mandaue City luyo sa Mandaue City Hall.
Sa pakighinabi sa Superbalita Cebu kang Atty. John Eddu Ibañez, executive secretary ni Mandaue City Mayor Jonas Cortes, siya niingon nga ang bicycle station abli 24/7 ug self-service.
Bisan kon self service, anaa ang mga security sa station gikan sa Janitorial and Security Services Unit (JASSU) nga mamahimong mo-assist sa mga magpa-repair.
Matag gabii, anaa ray gi-instalar nga suga sa repair station ug anaa ra sab ang security sa City Accounting building nga mobantay.
Ang bicycle repair station dunay hand pump nga gamiton aron sa pagpahangin sa ligid sa mga bisikleta nga na-flat. / KFD
Aduna say bicycle rack nga didto ibutang ang bisikleta samtang gaayo ug gisab-it sa rack ang mga tools nga gamiton sa pag-repair sa bike.
Sigon ni Ibañez nga mitugon si Mayor Jonas Cortes nga magtukod og Bicycle Repairing Station pinaagi sa tabang sa Department of General Services (DGS).
Giawhag ni Ibañez ang mga Mandauehanon nga ampingan ang tools aron mas molungtad og dugay ang paggamit sa repair station. (KFD)