PATAY nang nakaplagan ang usa ka pastor nga dunay tulo ka mga samad dinunggaban sa lawas ug liog sa alas 7:20 sa Lunes sa buntag, Agusto 17, 2020 sud sa iyang balay sa Sitio Bacawa, Barangay Mercedes, lungsod sa Poro, mga isla Camotes.
Si Reverend Erwin Costas, 40, minyo, sa Iglesia sa Diyos Espirito Santo, napalgang patay sa iyang inahan.
Si Police Master Sergeant Adorberto Carba, imbestigador sa Poro Police Station nga nahinabi sa Superbalita Cebu, nagkanayon nga ang inahan ni Costas maoy nakakita sa lawas nga nagbuy-od sa sala.
Matod pa ni Carba nga ang inahan ni Costas mibutyag nga nahibulong siya nga ang iyang anak wa mogawas sa balay aron mamahaw.
Ang balay sa iyang ginikanan naa ra usab sa sulod sa compound sa ilang simbahan.
Ang inahan nibutyag nga ang iyang anak sayo momata matag adlaw, moadto sa ilang balay aron mamahaw kay ila kining lutoan.
Iya kining giadto aron pakan-on unta, apan sa pag-abli niya sa pultahan, iyang napalgan ang anak nga nagkadugo.
Sa imbestigasyon, matod ni Carba nga nag-inusara na lang kini kay nagkabuwag sa iyang asawa.
Ang mga anak ni Costas giingong wa atol sa kremin kay didto sa pikas balay.
Nagtuo ang kapulisan nga posibling naglingkod si Costas dihang gi-atake sa wa mailhing killer kay ang lingkuranan dunay daghang dugo.
Unya nakakamang, gitiwasan sa pagdungab sa liog.
Nasuta sab nila nga wa magkatag ang mga gamit sa biktima hinungdan nga ilang palawman ang imbestigasyon sanglit lisod tuohan nga suicide ang nahitabo.
Ang wire sab sa electric fan nga naputol daw gituyo sa pagbutang duol sa lawas, daw nahikot aron mogawas nga nakuryentihan.
Hinuon ilang gitan-aw ang mga posibilidad nga may kalambigitan ang krimen sa usa ka hitabo mga duha ka tuig na ang nakalabay.
Si Costas dunay gikaaway kabahin sa yuta nga gitukoran sa ilang simbahan.
“Lisod kaayo nga tuohan nga suicide. Nagdunggab siya sa tiyan, dayon liog? Lisod kaayo. Mao gitan-aw namo nga posibling gikaaway niini,”dugang ni Carba.
Ang kabanay sab mitug-an sa kanila nga ang pastor nisulti nga duna siyay hulga, dunay tawo nga buot mopatay kaniya.
Nagtuo ang kapulisan nga posibling Lunes sa kaadlawon nisulod ang wa mailhing tawo sa balay nga way nakamatikod kay kusog kaayo ang uwan niadtong higayuna.