USA sa pinakadakong damgo sa daghang Pinoy ang makapuyo ug makatrabaho sa United States of America.
Nikusog ang pagtungha sa kabataan sa nursing aron makaadto puhon sa Amerika nga gitawag kaniadto ug “land of milk and honey.” Namit kaayo ang gatas og tam-is daw ang dugos didtong dapita basta kayod kalabaw lang.
Kadtong gustong manimpalad ug moasenso didto gyod moadto sa Amerika tungod sa kalidad sa ilang pamuyo ug sa kadaghan sa oportyunidad sa mga kugihan. Tiaw mong inoras ang trabaho didto gikan sa US$5 matag oras ngadto sa US$30 depende sa imong propisyon og trabaho.
Ang tigbantay og tiguwang kaniadto kay tag US$10-15 matag oras. Mokabat kini’g Php500-750 matag oras o Php 4,000-6,000 matag adlaw. Hayahay kaayo kung dinhi nato gastuhon kining kwartaha.
Apan kung didto gastuhon, mora ra sab ka’g nagsweldo og Php 15,000-20,000 matag bulan sa Pilipinas kay mahal man ang pagpuyo didto hasta ang buhis nga imong bayaran. Sa pagkatinuod, nag-ungaw sa ekonomikanhong problema ang Amerika ug dili na nila masuportahan ang “American lifestyle” nga waldas og tira-pasagad kay dako ang ilang gihulat nga pension ug “retirement benefits.”
Dako kaayo ang utang sa Amerika sa langyaw’ng nasud ilabi na sa China ug pildi usab sila sa “trade” kay halos tanang produkto sa Amerika iya o ginama sa China. Minos na sab ang negosyo sa Amerika nga armas tungod sa daghang kumpetisyon gawas pa gikapoy na ang tawo sa giyera nga ginama sa Amerika.
Sa akong kabahin morag dili madayon ang giyera tali sa US ug China kay di man mosukol ang China, pero maningil lang sila sa utang nga ikabangkarote sa daghang kumpanya sa Amerika.
Midako sab ang walay trabaho didto, mga tawong wala nay balay kay naimbargo sa banko busa naghulat nalang sa “welfare stubs” aron makakaon ug makapalit og panginahanglanon sa adlaw-adlaw sama sa gihatag nga “Special Amelioration Program” sa Pilipinas.
Apan gawas niini, nisulti si Monsignor Stephen Rossetti, usa ka paring “exorcist” o tigbugaw sa dautang espiritu sa diocese of Syracuse nga nasudlan na sa demonyo ang nasud nga Amerika.
Gisulat ni Rossetti sa iyang Exorcist Diary ang mga sinyales kung nganong nakaingon siya niini. Nakita niya ang hataas nga ang-ang sa diskuntento sa tawo. Nagdaghan ang “riot”, pagkinawatay, pagsukol sa awtoridad, pagtaas sa naghikog, pagkabungkag sa pamilya, hataas nga ang-ang sa walay kalipay, nawad-an sa paglaum nga maoy sinyales sa demonyo, matud pa ni Rossetti.
Ang pagkabungkag sa pamilya maoy dugukan sa daghang paghikog ug ang Covid-19 pandemic nakapasamot lamang sa maong kahimtang tungod sa “depression” o kaguol, nag-inusara, ug walay kauban ilabi na sa kabus nga komunidad.
Dugang pa niya nga masuk-anon kaayo ang mga taga Amerika nga modangop gidayon sa kabangis sama sa nagkakusog nga terorismo, “racism” ug daghan kanila nag-practice ug “witchcraft” ug ubang “occult practices” isip tubag sa ilang nakitang kahimtang sa palibot.
Daghan ang namatay sa “Islamic terrorism” ug pagpamusil. Nikunhod sab ang pagtuo sa Ginoo sa Amerika ug nagkakusog ang “abortion” adiksyon sa druga ug uban pang bisyo. Atong iampo ang Amerika.