COMPOSTELA, Davao De Oro -- Gikabalaka sa mga pasahero sa mga single motorsiklo ang sistema nga gipatuman sa lungsod sa paggamit sa helmet kay nagpuli-puli lang ang nagagamit niini.
Si alyas Matias naabtan sa Superbalita Davao nga nakiglalis sa drayber sa motor sanglit di siya mosul-ob sa helmet kay nabalaka nga basin kung ang unang misul-ob dunay sakit nga coronavirus disease (Covid-19).
Apan segun sa drayber nga nagpatago sa pangalang Mike nga di siya mopasakay kung di mosul-ob og helmet sanglit nabalaka pod siya nga masakpan nga wa magpasul-ob og helmet sa pasahero.
Tungod kay di mosul-ob og helmet, mipakyaw si Matias og pedicab padulong sa barangay nga iyang adtoan.
Nasayran nga hugtanong gipatuman sa lungsod ang pagpasul-ob og helmet dili lang sa mga drayber sa single nga motor, kondi lakip na sa pasahero o angkas.
Hinuon, ang pagbutang og barrier taliwala sa drayber ug angkas wa pa gipatuman sa lugar. (Dexter T. Visitacion)