DAVAO DE ORO -- Nahimong sentro ning panahona ang social media di lang sa impormasyon, apil na sab sa panginabuhian sa ordinaryong tawo.
Gibutyag ni Gemalyn, isip manicurista nga kasagsagan sa community quarantine kung diin gidid-an ang pag-abri sa parlor nga iyang gitrabahoan, nga ang social media ang nahimo niyang tambayan aron makonektar sa mga kustomer nga giserbisyohan ug mokita aron makapalit og bugas ug sud-an.
Samtang ang 16 anyos nga estudyante nga si Arnold, nagbutyag nga gamit ang Facebook account natabangan niya ang inahan pagbaligya sa gilutong kakanin nga mo-order agi sa social media.
Ang 60 anyos nga si Alfonso, human mawagtang ang Sky Direct sa ere ug wa nay kakuhaan og impormasyon sa mga balita, ilabi na nga way lokal nga mantalaan ang moabot sa New Bataan, ang post sa social media ang ginaatngan ug ginabasa sa selpon.
Nakatabang sab og dako alang sa inahan nga si May-may ang gimugnang Barter Community sa Facebook sa ilang lungsod sa Nabunturan sanglit napahimuslan kini, dili lang ang mga daang sinina sa anak kondi lakip ang mga daang gamit sa balay nga suma pa gibarter o gipabayloan og gatas aron dunay mainom sa usa ka tuig nga anak.
Ang social media sumala pa napahimuslan ning panahona aron makalahutay sa krisis nga gisagubang tungod sa Covid-19. (Dexter T. Visitacion)