KIDAPAWAN CITY -- Sukad sa pagsuwat ning balita, wala pa makaplagi ang dalagita nga nahulog sa kable nga gihimong tulay alas 8:15 sa buntag niadtong Lunes, Agosto 17.
Naila ang dalagita nga si Rosaña, 14 anyos, nagpuyo sa Banisilan, North Cotabato.
Matud ni uyoan nga si Kadir Salipada nga patabok ang iyang pag-umangkon sa tulay nga kable sa Maridagao River sa Banisilan gikan mibisita sa iyang lolo sa lungsod sa Carmen.
Apan aksidente nga nadalin-as si Rosaña ug wa makabalanse sa lawas hinungdan nga nahulog diretso sa lawom nga sapa.
Gipangita dayon ang dalagita sa iyang pamilya ug mga silingan apan wala na siya hikit-i human mitidlom sa lawom nga bahin sa sapa nga gituohang gianod sa kusog nga bul-og sa tubig.
Nagtuo sab si Salipada nga nabunal ang ulo sa dalagita sa bato sa
sapa.
Hangyo karon sa mga molupyo ngadto sa lokal nga panggamhanan sa lungsod nga unta mabutangan og hanging bridge ang maong dapit.
Sa pagsuwat ning balita, gihimo pa ang rescue and retrieval operation sa Municipal Disaster Risk and Reduction Management Office sa biktima. (Edgar E. Fuerzas)