COTABATO CITY -- Patay na nga nakaplagan ang negusyante og isda alas 4:00 sa hapon niadtong Lunes, Agosto 17.
Ang biktima giila nga si Jameer Panday Ikay, 21, minyo, molupyo sa Barangay Tambunan 2, Guindulungan, Maguindanao Province.
Gibutyag ni Maguindanao Police Provincial Office Director Colonel Arnold Santiago nga nakaplagan sa mga molupyo ang patay nga lawas sa biktima sa Barangay Ambolodto, Datu Odin Sinsuat sa nahisgutan gihapong probinsiya.
Gihulagway nga nakaangkon og samad pinusilan ug dinunggaban ang biktima sa nagkadaiyang bahin sa lawas nga maoy hinungdan sa iyang kamatayon.
Mismo ang amahan sa biktima nga si Abdul Jakeer Gandao Ikay maoy nag-ila sa patay nga lawas sa anak.
Base sa alegasyon ni Abdul nga ang biktima gipapatay sa iyang asawa apan kapulisan sa Datu Odin Sinsuat Municipal Police Station padayon pang nagsusi sa maong hitabo.
Sumala pa police report nga ang asawa sa biktima nilayas sa ilang balay subay sab sa gipa-blotter sa ugangan niini.