DUL-AN sa 300 ka mga chess player sa Sugbo ug laing lugar sa Pilipinas ang magtigi sa pautokay sa online chess competition sa 6th Cebu Stay at Home Chess Challenge “The National” karong Septiyembre 5, 2020.

Mao kini ang unang higayon nga ablihan sa mga organiser ang torneyo alang sa mga national players human ang malamposan nga lima ka edisyon nga puro taga Sugbo lamang ang mga partisipante.

Gilauman nga moduwa ang banggiitan nga players sama nila Grand Masters Mark Paragua, International Master Oliver Dimakiling, National Master Merben Roque, NM Rommel Ganzon ug NM Edsel Montoya.

“Sa fifth edition aduna tay 178 participants karon kay national man ta mga 200 to 300 ka players ang mosalmot ani atong online tournament,” matod sa organiser nga si IM Kim Steven Yap sa Cebu School of Chess.

Ang torneyo, nga gisuportahan sa Chess Infintum sa pagpangulo ni Benjamin Boojie Lim sa Salon de Rose, duwaon sa lichess.org sa Arena format ug magsugod sa alas 5:00 sa hapon.

Matod ni Yap nga adunay mahitabong “Grand Finals” karong Disyembre 5, 2020.

Ang Top 5 nga Sugbuanon ug lima ka non-Cebuano players ang magtigi sa usa ka round-robin tournament.

Mokabat sa P33,000 ang kinatibuk-ang ganting salapi alang sa mga mananaog.

Ang Top 5 sa open category makabulsa og P5,000, P4,000, P3,000, P2,000 ug P1,000.

Ang modaog sa female ug kiddie (14-Under) nga mga kategorya makabulsa og P1,000.

Ang moduwa makita sab pinaagi sa live streaming sa Cebu School of Chess FB page og adunay mga raffle prizes nga puwedeng madaog ang fans nga motan-aw sa mga duwa.

Ang registration fee anaa sa P100 para sa mga morehistro sa dili pa ang Septiyembre 3, 2020.

Samtang ang late registration anaa na sa P200.

Makita ang mga detalye kon unsaon pagrehistro sa Cebu School of Chess FB page ug pwede sab tawagan si Yap sa 0977-6864660.