DAGHAN na karon ang nanginabuhi sa bisan unsang paagi na lang. Lisod ang trabaho, nihit ang kwarta unya kinahanglan mokaon gihapon kada adlaw.
Mao kini hinungdan nga bisan unsa na lang ang paagi nga himuon aron lang maka-kwarta. Usa na niini mao ang pagbaligya sa bisan unsang butang pinaagi sa online ginamit ang internet.
* * *
Dili na kinahanglang moadto pa sa department store o sa merkado. Tanang pagkaon o butang mapalit online.
Kon nagkinahanglan ka og utanon, panakot o mga prutas, mahimo nga mo-order online unya pipila ka oras, i-deliver na kini.
Cash-on-delivery (COD) kasagaran ang kasabotan mao nga manawag daan ang supplier kon pila ang bayronon sa gi-order aron diretso na ang bayad inig abot sa gi-order.
Buhi ang negosyo sa supplier, makakwarta sab ang nag-deliver unya maserbisyohan pod ang mipalit.
* * *
Usa kini ka paagi nga malikayan ang pag-adto sa mga dagkong tindahan aron lang mopalit sa inadlaw nga panginahanglan ug malikayan ang pagdasok sa katawhan.
Nindot kini sanglit giawhag man ang katawhan nga mopondo lang sa balay kon walay importanteng lakaw sa gawas.
Niining paagiha, malikayan ang pagkuyanap sa Covid-19.
* * *
Daghan ang nahadlok sa Covid-19. Daghan gyod ang nakombinsir nga delikado kaayo ang maong sakit. Kusog pa nga motakod unya dili pa gyod makita o mahikap.
Apan sa mga pagtuon nga gihimo, apil na ang pagtandi sa mga sakit nga ato nang nahibaw-an, migawas nga mas delikado ang Dengue kay sa Covid-19.
Sa samang gidugayon, mas daghan ang namatay sa dengue fever kay sa Covid-19.
Ang dengue dili mopili sa biktimahon. Bata, tigulang, masakiton o himsog mahimong mamatay sa dengue.
Apan ang Covid-19 sa atong nahibaw-an, magpili lang sa duna nay problema nga sakit, labi na kon kining maong sakit anaa sa baga o sa kasingkasing.
Kadtong himsog ang panglawas, matakdan man gani apan dili mahibaw-an ug gitawag lang sila og asymptomatic. Mao kini hinungdan nga daghan ang nagtuo nga mas delikado ang dengue kay sa Covid-19.
* * *
Sa mga miagi na sa sakit nga Dengue unya naayo, simple lang ang paagi nga gihimo, labi na kadtong wala lang mosulod sa ospital tungod sa kawad-on.
Moinom lang sa pinabukal nga dahon sa tawa-tawa, ang uban moinom sa pinabukal nga dahon sa kapayas. Wala man tuod kini i-rekomendar sa mga doktor apan kasagaran sa nahitabo, dili lang pod mobabag ang mga doctor tungod kay personal kini nga desisyon sa hingtungdan.
Kadtong dunay kwarta, moinom lang sa Motts Apple Juice,
Sa mga nasakit sa Covid-19 o kadtong na-positive, daghan ang misulti nga naayo sila kay miinom og antibiotic. Ang uban, migamit sa nasal spray nga dunay sagol nga steroid.
Matod pa, naayo sila sa ilang gibati nga kalisod sa pag-ginhawa, pamanhod o pamikog sa mga kaunoran og hangtod karon, maayo na ang kondisyon sa ilang panglawas.
Dili man tuod kini opisyal nga tambal alang sa Covid-19 apan daghan ang miuyon nga bisan unsa lang ang gamiton basta maayo, bahala na og dili girekomendar sa doktor.
Parehas sa manganakay, daghan ang nagtuo nga kon haplasan kini sa lana nga gihumolan sa panit sa halas o sawa, dali ra nga manganak ang mabdos.
Wala kini girekomendar sa doktor apan kon buhaton kini, dili ra pud sila mobabag.