Mekaniko, technician, ex-con nangadakpan sa buy-bust

BUY-BUST: Wa makaipsot sa kapulisan sa lungsod sa Compostela sila si Jevy Mahinay (ikaduha gikan sa wala) ug iyang bata-bata nga si Genesis Ygoc (wala) atol sa buy-bust niadtong Lunes sa gabii, Agusto 17. (TAMPO SA COMPOSTELA POLICE STATION)
BUY-BUST: Wa makaipsot sa kapulisan sa lungsod sa Compostela sila si Jevy Mahinay (ikaduha gikan sa wala) ug iyang bata-bata nga si Genesis Ygoc (wala) atol sa buy-bust niadtong Lunes sa gabii, Agusto 17. (TAMPO SA COMPOSTELA POLICE STATION)

GIILANG high value individual (HVI) nga mekaniko, technician ug ex-convict nangadakpan sa managlahing mga buy-bust sa kapulisan niadtong Lunes, Agusto 17.

Ang usa sa nasikop giilang si Jevy Mahinay, 43, minyo, mekaniko, taga Purok Nangka, Barangay Tamiao, Compostela.

Lakip sa nasikop ang iyang bata-bata nga si Genesis Ygoc, 32, ulitawo, taga Barangay Tamiao.

Si Police Captain Vincent Zozobrado, hepe sa Compostela Police Station nga nahinabi sa Superbalita Cebu, nagkanayon nga si Mahinay dugay na nga nalakip sa iyang listahan.

Sa buy-bust sa iyang mga sakop sa Drug Enforcement Unit, ilang gipalitan si Mahinay og usa ka medium nga putos sa shabu nga balor og P1,000.

Dihang napusasan, ilang nakuhaag laing duha ka dagkong mga putos sa shabu, pito ka gagmayng putos ug .38 kalibreng revolver nga dunay duha ka mga bala ug paraphernalia.

Matod ni Zozobrado nga ang drugas motimbang og 11.51 gramos nga mobalor og P78, 268 base sa Dangerous Drugs Board (DDB) value.

Laing nasikop niadtong Lunes sa alas 8:25 sa gabii sa Purok Tanglad, Sitio Tulay, Barangay Cotcot, lungsod sa Liloan giilang si Ohwin Yrog-irog, 40, minyo, taga Barangay Jubay sa mao nga lungsod.

Nakaipsot ang iyang kakunsabo nga giilang si Lemuel Taoayan.

Si Police Lieutenant Colonel Randy Korret, hepe sa Provincial Intelligence Unit sa Cebu Police Provincial Office, niingon nga ilang nakuhaan og usa ka putos nga shabu, usa ka medium pack sa gituohang shabu nga motimbang og singko gramos nga mobalor og P34,000 base sa DDB value.

Samtang usa ka ex-convict nakuhaag binultong drugas sa buy-bust sa samang gabii sa Barangay Poblacion Oriental, lungsod sa Consolacion.

Si Jan Lourd Resma, 21, ulitawo, taga Brgy. Jagobiao, dakbayan sa Mandaue, nadakpan sa joint operation sa Regional Drug Enforcement Unit (RDEU7) ug Consolacion Police Station.

Si Captain Romeo Caacoy, Jr. sa RDEU7 nga nahinabi sa Superbalita Cebu, nagkanayon nga si Resma ilang gipalitag usa ka putos nga shabu balor og P500.

Dihang ilang napusasan, nakuhaan kini og laing duha ka medium nga bulto sa 5.03 gramos nga shabu nga mobalor og P43,000 base sa DDB value.

Sumala pa ni Caacoy, si Resma notadong kawatan ug napriso apan dihang, nakagawas nagnegusyog illegal nga drugas.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph