MAHIMO nang mag-angkasay sa motorsiklo nga way barrier ang magtiayon sugod sa Miyerkules, Agusto 19, 2020.
Si Philippine National Police Chief General Guillermo Eleazar nipahibawo nga mao kini ang naaprobahan sa National Task Force (NTF) Against Covid-19 sa Martes, Agusto 18.
Alang kini sa mga dapit nga ubos sa general community quarantine (GCQ), sama sa Dakbayan sa Sugbo, Mandaue, Lapu-Lapu ug Talisay.
Apan dunay guidelines nga kinahanglan nga sundon sa riders, matod ni Department of Transportation (DOTr) Assistant Secretary Goddess Hope Libiran.
Mao kini ang mosunod:
* Sa riders nga nagpuyo sa samang balay, wa na kinahanglana ang motorcycle barrier.
* Alang sa mga rider nga wa magpuyo sa samang balay: kinahanglan nga dunay Angkas designed barrier.
* Ang backrider kinahanglan nga usa ka authorized person outside residence (APOR).
* Ang driver mahimo o wa kinahanglana nga Apor.
* Kinahanglan nga ang motorsiklo pribadong gipanag-iya ug di for hire kun habalhabal.
* Ang riders kinahanglan mag face mask ug mag-full-face helmets nga gisul-ob sa tanang mga higayon samtang mag-angkas.
Sa mga dapit nga ubos sa modified GCQ, matod ni Libiran, naa ra sa local chief executives kon mosagop ba sila sa mao nga kamandoan.
Kining pagtugot sa backriding nga wa kinahanglana ang barrier maoy pagbaliktad sa gisaway og maayo nga kamandoan sa Inter Agency Task Force (IATF) nga kinahanglan ang nag-angkasay sa motorsiklo nga magtiayon magbutang og barrier sa motorsiklo aron malikayan ang pagtakod sa coronavirus disease (Covid-19).
Dunay duha ka mga desinyo sa barrier ang gitugotan. Kini mao ang Governor Arthur Yap design nga itaud sa motorsiklo samtang ang ikaduha sa Angkas nga sama og backpack.
Alang sa publiko, binuang ang kamandoan tungod kay ang magtiayon nagpuyo lang sa usa ka balay ug magdulog lang gihapon sa pagkatulog magabii.
Sa nanglabay nga mga buwan, daghang local chief executives ang nanghangyo nga tugtan ang magtiayon o mga sakop sa pamilya nga makaangkas kay mao kini ang gisaligang transportasyon samtang naa sa quarantine ang mga dapit sa nasod.
Apan ang IATF, labina si Interior Secretary Eduardo Año, wa motugot sa hangyo.
Bisan ang mga eksperto sa motorsiklo ug dagkong mga tiggama ug supplier niini supak sa pagbutang og barrier tungod kay kuyaw kini sa disgrasya.
Matod nila nga ang barrier makadaut sa aerodynamics sa motorsiklo hinungdan nga kuyaw sa mga aksidente.
Nakita usab sa organisasyon sa mga engineer sa nasod nga ang barrier di makapugong sa pagtakod sa Covid-19 tali sa angkas ug sa driver, hinunoa mas kuyaw pa hinuon sa pagpanakod, tungod sa nabalda nga air flow. (REV)