MOHANGYO si Mayor Edgardo Labella ngadto sa Regional Inter-Agency Task Force (RIATF) ug sa Department of the Interior and Local Government (DILG) para matugotan ang Cebu City nga makatapok og 30 porsiyento sa kapasidad sa mga simbahan sama sa gipatuman sa Metro Manila niining panahon sa general community quarantine.
Kini human gipahibawo sa Malacañang ang pag-downgrade sa quarantine classification sa Metro Manila ug ubang local government units gikan sa modified enhanced community quarantine (MECQ) ngadto na sa GCQ sugod karong adlawa, Agusto 19,2020.
“The fact that Metro Manila and other LGU’s in Luzon are in GCQ and allowed 30% of the capacity of their churches and other religious groups to hold their mass and other services, I am making a representation to the Regional IATF, DILG and to National IATF that Cebu City churches and other religious gatherings will also be allowed to hold the same,” padayag ni Labella.
Ang mayor niingon nga base sa iyang obserbasyon sa niaging duha ka mga Dominggo, diin gitugotan nga adunay misa apan 10 porsyento ra sa ilang kapasidad ang tigutogan nga makatambong, hapsay ug linaw ang implementasyon sa minimum health protocol.
“I have noticed in the last two Sundays, the churches have their own respective pastoral security people and pastoral council that strictly and efficiently implemented the minimum health protocol and no problems encountered in so far as social distancing because they were also monitored by PNP,” dugang ni Labella.
Ang simbahang Katoliko di mopasulod sa manimbahay kon way face mask, face shield, way quarantine pass sa mga manimbahay sa Dakbayan sa Sugbo.
Kuhaan og usab og temperatura ang mosimba ug nagpatuman usab og social distancing, apil na ang pagbutang og alcohol sa kamot sa di pa mosulod.
Duna na usay gipamutang nga entrance ug exit aron di magsugat ang mga manimbahay.
Siya nalipay sa padayon nga maayong gipakita nga disiplina sa katawhan sa siyudad nga niresulta sa padayon nga pag-ubos sa mga kaso ug nalimitahan ang subling pagdaghan sa Covid-19.
Gani, ang Cebu City naka-record og pito ra ka mga kaso niadtong Lunes, Agusto 17, nga maoy labing ubos human nisulbong ang kaso niadtong Hunyo hangtod sa Hulyo.
Ang mayor padayon nga nanawagan sa kapin 1 milyon ka mga lumolupyo sa dakbayan, lakip na kadtong mga nagpuyo gawas sa siyudad, nga ipadayon ang disiplina sa matag usa.
Batonan ang pagtamod sa minimum health protocol sama sa pagsul-ob og face mask, face shield, paglimpyo sa kamot, social distancing ug likayan ang sige og tsismis nga maoy sinugdanan sa tapoktapok.