USA ka tectonic earthquake nga adunay gikusgon nga 6.6 magnitude ang mitay-og sa Visayas area niadtong Martes, Agosto 18 sa buntag.
Natala sa record sa Philippine Institute of Volcanology and Seismology (Phivolcs) nga ang linog nagsugod duol sa Catiangan, Masbate sa gilawmon nga usa ka kilometro.
Ang maong pagtay-og miresulta sa paghulpa sa pipila ka mga istruktura ingon man ang pagkasi-ak sa sementado nga kalsada sa Cataingan base sa mga hulagway nga gi-post sa Philippine Red Cross Masbate Chapter nga gi-share sa social media.
Ang linog nabatyagan sa intensity VII sa Cataingan sigun sa Phivolcs Earthquake Intensity Scale nga mi-epekto sab mga lalawigan sa Cebu, Bohol, Samar, Leyte, Biliran, Negros Island, Panay Island ingon man sa Gingoog, Misamis Oriental sa Mindanao ug pipila ka bahin sa Bicol region ug probinsiya sa Quezon, habagatang bahin sa Luzon.
Samtang luwas ang lalawigan sa Sugbo sa maong linog.
Subay sa listahan sa Provincial Disaster Risk Reduction and Management Office (PDRRMO) adunay 14 ka mga lungsod nga mitaho nga nakasinati sa pag tay-og sa yuta.
Kini mao ang dakbayan sa Danao, Lapu-Lapu, Mandaue, Talisay, lungsod sa Alegria, Carmen, Medellin, Minglanilla, San Fernando, Tabogon og Tabuelan.
Hinuon Lungsod sa San Francisco sa isla sa Camotes nakasinati ug intensity 3 nalakip na ang lungsod sa Madridejos ug Sta. Fe.
Sigon sa report sa PDRRMO pinaagi ni Rhee Telen ang tigpamaba sa maong opisina nga way natala nga danyos o naangol atol sa linog. (ANV, SunStar Philippines)