MOABOT ngadto sa 20 ka pamilya ang apektado sa dakong baha nga nasinati sa Barangay Bonbon, dakbayan sa Sugbo niadtong Agusto 17, 2020.
Resulta sa pagbunok sa kusog nga uwan, misuyla na ang sapa gumikan sa bul-og sa baha hinungdan sa pag-awas sa tubig ug niabot sa mga kabalayan niresulta sa pagkagusbat ug naanod ang parte sa mga balay.
Lakip sa kabtangan nadaot mao ang awto nga nabanlas usab gumikan sa kakusog sa tubig sa dihang naabtan sa tubig lugar diin kini giparada.
Si Mayor Edgardo Labella, nimando dayon ngadto sa Department of Social Welfare and Services (DSWS) sa pag-atiman sa mga tawo nga apektado sa nahitabo nga kalamidad.
Ang operation chief sa DSWS nga si Jonil Matuguina, nitug-an sa Superbalita Cebu nga nagpadala dayon sila og food packs ug disaster kit para sa 20 ka pamilya ug nipadala sa ilang crisis management team para maoy mo-atiman sa mga tawo.
Lakip sa ilang nadawat mao ang bugas, de lata, habol, balde ug ubang dinalian nga panginahanglan.
Ang mayor sa iyang bahin niingon nga gipasidan-an na ang maong mga residente sa mga barangay officials nga dili luwas puy-an ang maong dapit.
Si Labella dili na motugot nga mobalik og tukod sa ilang balay ang kadtong mga apektado ug kadtong nahabilin, hayan pabalhinon kini ngadto sa mas luwas nga lugar sanglit gikonsidera kini sa disaster zone.
Base sa report ni Matuguina, ang grabeng apektado mao ang sityo Managuksok ug Upper Biasong diin partially damaged sa baha ang 17 ka balay, duha ang totally damaged ug usa ang gipaabangan kansang apektado niabot sa 76 ka mga tawo.
Ang City Disaster gimanduan ni Labella nga mag-alerto sulod sa 24 oras sanglit dili maayo ang dagan sa panahon ug mokalit lang og bundak ang uwan nga moresulta sa baha o landslides.
Samtang sa dakbayan sa Talisay giangkon ni Linao Barangay Captain Ulysses Raganas nga dugay nang problema nila ang tubig baha diha sa kalsada panahon nga mobundak ang ulan nga moresulta sa trapik.
Kini tungod sa mga basura nga maoy nakabara sa mga drinage system gikan sa usa ka subdivision.
Adunay duha ka mga drainage system nga agianan sa tubig paingon sa Barangay Lipata sakop na sa lungsod sa Minglanilla.
Dugang ni Raganas nga ang kakuwang sa disiplina sa mga residente nga magpataka og labay sa ilang mga basura resulta sa pag-clog up sa drainage system.
“Atong gihimo nga remind mao ang pagpalimpyo matag adlaw sa lugar aron kon moulan dili na kaayo mosaka ang tubig unya akong pakuhaan ug hulagway sa akong mga tanod sa ilang pag monitor,” matod pa ni Raganas. (PAC, BBT)