ANG panaw sa mga katawhang Israel nga gipangalanan nga Exodus pagawas gikan sa pagkaulipon sa yuta sa Egypt, padulong sa yuta sa saad, Canaan, nagbilin og mga pagtulon-an dili lang sa nasud Israel apan sa tanang henerasyon sa tawo sa tibuok kalibutan.
Ang panaw sa 8,482 kilometros nga gilay-on, unta mahuman sulod lang sa onse ka adlaw apan milungtad og 40 ka mga tuig aron usbon sa Dios ang ilang tagsa-tagsa ka mga batasan usa sila gipasulod sa yutang gisaad, ang Canaan.
Sa ilang pagpanaw, giubanan sila sa Dios pinaagi sa panganod kon adlaw ug sa siga sa kalayo panahon sa mangitngit nga gabii. Gipaulanan sila og pagkaon matag adlaw, mga manna nga mahulog gikan sa langit.
Mipatigbabaw ang kagahi sa ilang mga ulo kay sa sugo sa Dios nga mopahulay sa adlaw nga Sabado, nanggawas gihapon pamasin nga dunay manna nga mahulog gikan sa langit.
Ilang gibasul si Moises nganong gipagawas pa sila sa Egypt diin buhong sila sa pagkaon, samtang sa ilang panaw, manna sa buntag, hangtud sa panihapon ug sa laing mosunod nga mga adlaw mao lang gihapon.
Dihang gipatuman ang sugo nga "Stay at home," mga Pinoy nagsige og yawyaw nganong bugas NFA, tinapa ug noodles ang gihatag sa gobyerno nga pagkaon?
Mga kontra sa gobyerno nangdani sa katawhan nga manggawas ug mangitag ilang pagkaon kay luod na ang ilang kuto-kuto sa tinapa ug odong!
Sa milabay nga Dominggo, inay muhatag og maayong pagtulun-an sa mga sakop sa simbahan sa Katoliko, si Bishop Broderick Pabillo, apostolic Administrator sa Archdiocese of Manila, atol sa iyang pag mesa sa San Felipe Neri Parish sa Mandaluyong City, iyang gigamit ang pulpito aron pagbatikus sa gobyerno tungod inay hatagan og importansya ang pagpangitag tambal sa virus sa covid-19 ug ang paghatag og trabaho sa katawhan, mas gihatagan og bili ang Death Penalty. "Makuulaw ug makahadlok."
Ang atong nasud nahimo nang nanguna sa gidaghanon sa natakbuyan sa Covid-19 sa mga nasud sa Southeast Asia, pahayag sa Obispo
Iya sab giawhag ang katawhan nga manggawas, dili magpakahilom.
"Nahadlok ba kamo nga tawgon nga mga rebelde?" pangutana sa Obispo.
Masabot ba nga giaangkon ni Pabillo nga kauban siya sa mga rebelde o andam siya nga pagatawgon nga rebelde sa iyang pagbatikos?
Tungod sa mga pagbatikos nga dala sa Covid-19, si Department of Foreign Affairs Secretary Teodoro Boy Locsin ni tubag nga nagkanayon, "Let's blame God for it, he created the virus".
Ang simbahan mao unta ang motudlo sa katawhan unsaon pagbaton og pagtoo, unsay angayan buhaton karon nga nia ta sa pandemya, dili maoy magsugnod aron magubot ang atong katilingban.
Ang atong mga pangulo sab sa ahensya sa gobyerno mopakita nga sila adunay ligdong dili ang taras nga daw walay Ginoo sa kinabuhi sa mga nagadumala sa atong nasud kay Dios man ang nagpahimutang kanila diha sa kagamhanan.
Ang pagka bagulbulan sa Israel maoy nakalangan sa ilang panaw, ang onse ka adlaw nahimong 40 ka mga tuig didto sa kamingawan. Sa dagan sa atong panahon, ang pagsigi og bagulbol, ang punay nga pagsupak sa mga health protocol ug ang dili pag ila sa Ginoo maoy mopadugay sa atong pag antus.
Kung magpabilin nga dili ta kabalo mosunod sa mga instruction ug labaw sa tanan dili ta moila sa Labaw nga Makagagahom, magpabilin nga mga bagulbulan, kanus-a pa kaha kita makapahulay gikan sa kahasul nga natagamtaman sa tanan?