KIDAPAWAN CITY -- Gikabalaka karon sa mga molupyo ang pagdahili sa dakong bukid nga mitabon sa sapa alas 11:00 sa gabii niadtong Martes, Agosto 18.
Sa taho gikan sa Provincial Disaster Risk Reduction and Management Office (PDRRMO)-Cotabato, nasayran nga kalit lang nakadungog og daw buto sa midahili nga yuta ang mga molupyo sa utlanan sa mga barangay sa Magkaalam ug Ilian sa Magpet, North Cotabato.
Pagkabuntag, didto na nakita sa mga molupyo ang midahili nga bahin sa dakong bungtod nga mitabon sa sapa (Kabacan River).
Suwerte nga walay nadisgrasiya sa hitabo gumikan walay mga balay duol sa nahisgutang sapa.
Apan gikabalaka kini sa mga molupyo sa dapit gumikan nababagan sa midahili nga yuta ang sapa ug posibleng mahimo kining linaw ug kung moawas ang tubig sa sapa, anuron niini ang kabalayan sa ubos nga bahin.
Ang nahitabong landslide bunga sa walay puas nga pagbundak sa kusog nga ulan sa dili maayo nga lakat sa panahon sa dapit.
Giplano na sa mga opisyal sa lokal nga panggamhanan sa Magpet nga abrihan ug kuhaon ang midahili nga mga yuta sa sapa aron malikayan ang laing kalamidad sa maong dapit.