DAW naigo og knockout punch ang Philippine boxing human nakadesisyon ang Cebu-based ALA Boxing Promotions nga isirado na ang ilang tilon human sa 35 ka mga tuig nga operasyon.
Ang ALA Boxing maoy nagtagbaw sa mga mahiligon og boksing dili lang sa Sugbo kon dili sa tibuok Pilipinas ug naghulma sa boxing careers sa dekalidad nga mga boksidor sa nasod sama ni Donnie “Ahas” Nietes, kinsa maoy longest reigning Filipino world champion.
Niadtong Martes sa gabii, opisyal nga gi-anunsiyo sa ALA Boxing (ALA Promotions ug ALA Boxing Gym) ang ilang desisyon.
Gipasabot sa ALA Boxing nga ang kahasol nga hatod sa coronavirus disease 2019 (Covid-19) ug ang pagkasirado sa ilang dugay nang TV network partner ABS-CBN mao ang mga hinungdan nga hingpit na silang mobiya sa kalibutan sa boksing.
Sa ilang pagbiya, ang labing bantugang boxing promotion sa nasod nagpasalamat sa suporta nga gihatag sa boxing fans, boxers, trainers, office staff, media, boxing organization ug sponsors.
“After 35 years, ALA Boxing (ALA Promotions and ALA Gym) would like to say farewell and thank you to our supporters from all over the world,” tipik sa opisyal nga pamahayag sa ALA Boxing.
“The pandemic and the closure of our long-time broadcast network partner, ABS-CBN, has affected the overall situation and the future of the company. All of our fighters will be released so they can look for greener pastures for their respective careers.”
Gawas kang Nietes, ang ubang sikat nga mga boksidor nga produkto sa ALA Boxing mao sila si two-division world champion Gerry Peñalosa, kanhi International Boxing Federation (IBF) light flyweight champion Milan Melindo, kanhi World Boxing Council (WBC) light flyweight king Rodel Mayol, kanhi WBC flyweight titlist Malcolm Tuñacao ug kanhi World Boxing Organization (WBO) minimumweight champion Merlito Sabillo.
Nakakulit sab og pangalan ubos sa ALA Boxing sila si Ray “Boom-Boom” Bautisa, AJ “Bazooka” Banal, ug ZC Gorres.
Gikan sab sa ALA Boxing ang sumosulbong nga mga boksidor nga sila si world-rated Melvin Jerusalem, Albert Pagara, Jeo Santisima, KJ Cataraja ug Jonas Sultan.
Si Nietes, kinsa four-division world champion, miingon nga dili niya makab-ot ang iyang pangandoy kon dili tungod sa ALA Boxing.
Usa ka kanhi janitor si Nietes sa ALA Boxing una kini nahimong boksidor.
“Mapasalamaton ko sa ALA Promotion kay kon di tungod nila, dili ko mahimong four-time world champion,” matod ni Nietes.
“Sa pagkakaron wala pa ko’y plano about sa boxing kay lisod pa man ang panahon ron. Pag ma-okey na seguro ang tanan basin maka huna-huna pa ta sa boxing.”
Sa interbyu sa Sun.Star Cebu, iguong buhatan ning mantalaan, si Peñalosa nipadayag sa iyang pagkasubo ug nagbalik lantaw sa iyang kasinatian isip sakop sa ALA Boxing.
“It’s so sad. ALA is a maker of champions and I’m one of those. It’s a pity that ALA is gone, many need ALA especially the aspiring boxers,” batbat ni Peñalosa. “I have been with ALA for more than five years. Since I was an amateur until I was a pro. I fought for the Philippine team but I was from ALA. I fought in the Jakarta Cup in Indonesia and got a gold medal with the support of ALA. I’m always indebted to ALA. It’s just sad because I think they could have helped more boxers.”
Ang ALA Boxing, nga gitukod ni Antonio L. Aldeguer niadtong 1985, nakapahigayon na sab og promosyon sa Amerika ug Dubai.