SUPORTADO sa Department Of Tourism (DOT) ang plano karong pagbukas og balik sa turismo sa dakbayan karong gipaubos na sa modified General community quarantine (MGCQ) ang dakbayan.
Kini ang gipahibawo ni DOT-7 Regional Director Shalimar Tamano human siya personal nga mibisita sa dakbayan aron pakigtagboan sila si Lapu-Lapu City Mayor Junard “Ahong” Chan ug Cindi King-Chan, ang pangulo sa Lapu-Lapu City Tourism, Cultural and Historical Affairs Commission (TCHAC).
Matod ni Tamano, anaa ra ang desisyon sa lokal nga kagamhanan kung ablihan na nila pag-usab ang turismo sanglit ang dakbayan maoy usa sa dagsaon sa turista hilabi na nga anaa mahimutang ang maanindot nga mga hotel ug resort ingon man puti nga mga balas sa kabaybayonan.
Anaa usab mahimutang sa dakbayan ang international airport apan gidili pa hinuon ang inter-island tourism travel.
Gipasalig ni Tamano nga andam ang iyang buhatan nga makigtambayayong sa kagamhanan aron sa paglatid ug health protocol ug guidelines kalabot sa pagpanawat ug turista sa dakbayan.
Gawas sa DOT ang Department of Trade and Industry (DTI) 7 ug kapulisan andam na usab sa pag-abag sa pagbukas sa turismo sa dakbayan.
“Nagpasalamat mi sa invitation ni mayor with regards to the possibility of opening slowly its tourism to domestic tourist,” matod ni Tamano.
Si King-Chan, sa iyang bahin, nipadayag nga human sa lima ka buwan panahon na gayud nga buksan ang turismo sa dakbayan.
Nasayran nga daghan gayud ang nawad-an ug panginabuhian sa pagsirado sa turismo sa dakbayan.
Dili lang hotel ug resorts kun dili lakip na usab ang motor banca operators sa nabantog nga island hopping.
Ang kagamhanan mitabang kanila niining panahon sa pandemya pinaagi sa paghatag kanila ug ayuda nga ikasapar sa ilang inadlaw-adlawng panginahanglanon.
Sukad niadtong Agusto 5 si King-Chan nilibot na sa mga hotel ug resort sa dakbayan aron masigurong han-ayon na nila ang health protocol ug guidelines sa pagbukas sa turismo ubos sa new normal.
“Mag ready na ta para mag open na ang atong turismo ug makahatag na ta ug pangibahi sa atong katawhan,” sumala ni King-Chan. (GCM)