MAGPADAYON ang tourism activities ug ubang kalihokan sa kalungsoran sa Sugbo nga tambongan ni Gobernador Gwendolyn Garcia bisan sa iyang limitado nga paglihok tungod sa bikil sa hawakan sa iyang lawas human nadakin-as sa ilang panimalay di pa dugay.
Mao kini gipahibalo sa Cebu Provincial Information Office (PIO) sa Miyerkules, Agusto 19.
Karong Lunes, Agusto 24, gikatakda nga molibot si Garcia sa kalungsoran sa pag-award sa mga mananaog sa “Sugbusog”, backyard gardening program sa kagamhanan.
Apan base sa pamahayag ni Dr. Jose Antonio G. San Juan, ang orthopedic surgeon sa gobernador, posibleng molanat pa og tulo ka mga buwan ang pagkaayo sa fracture sa hawak sa gobernador
“We’re not putting her at risk of making things worse than they are right now. Let’s say we expect her to be maximally recovered by around three months,” matod ni San Juan.
Pahinumdom sa doktor nga gidid-an pa sa pagsul-ob og high heels.
“I already told her nga for example, if the governor doesn’t mind, mga footwear restriction sa karon kay we are all familiar with what the governor prefers to use when she goes to work. So she can’t use those kinds of footwear for now for three months.”
Samtang, wala pay petsa kon kanus-a ang sunod nga hugna sa pagbukas sa tourism activities sa ubang kalungsoran sa Sugbo.
Nagpadayon pa ang inspection sa Provincial Tourism Task Force (PTTF) sa kalungsoran kon naka-comply ba kini sa mga health measures sa probinsya.
Giawhag sa Hunta Probinsyal ang kapulisan pinaagi ni Cebu Provincial Police Office (CPPO) Director Police Colonel Roderick Mariano sa pagsusi sa mga lugar nga posibleng dagsaon sa mga tawo.
Kini aron pagsiguro nga matuman ang mga lagda labot sa health protocol sa tourist destinations sa lalawigan. Kini subay sa resolusyon nga gipangamahanan ni Bokal Thadeo Ouano sa sixto distrito.
Ang lalawigan gipaubos na sa modified general community quarantine (MGCQ) hinungdan nga nakapangabli na pag-usab ang mga estabilesemento sa turismo apan 50 porsiyento lang sa ilang kapasidad sa mga kustomer ang dawaton.
Apan tungod anaa pa ang presensya sa coronavirus disease 2019 (Covid-19), gikinahanglan gihapon nga mag matngon ang mga turista ug mosunod sa health protocol nga giluwatan sa kagamhanan sa lalawigan.
Kini sama sa pagsul-ob og mask, face shield, air purifier necklace, pag-disinfect ug physical distancing.
Sa pagseguro nga nahisubay ang mga turista sa insakto nga paagi, giawhag ang sakop sa kapulisan sa probinsya nga maoy mosusi sa tourist destinations sa lungsod nga nangabli na og ang posibleng mosunod pagbukas.
Sa unang semana sa Agusto, gilusad sa lalawigan ang tourism activities sa lungsod sa Oslob, Moalboal, Barili sa habagatan sa lalawigan ug kaislahan sa Camotes sa amihanan.
Ang mga nahisgutan nga lugar, gilauman nga kanunay nga masusi sa kapulisan paagi usab nga malikayan ang pagkatap sa gikahadkan nga Covid-19. (ANV)